【抹茶泡芙】~附食譜

                          做完噚日個Donut Cake

總算鬆一口氣

朋友祇係俾張圖我

問我可否做得到

諗咗一輪就應承朋友幫手

之後真係有點後悔

因為個cake係要31號要

要返工無咁多時候

一心急好易出錯

有乜閃失無時間再做

唯有請日假

個心先定少少

始終應承左人

唔想做唔到

雖然事前做過好多次練習

但當天做個泡芙都要做第二批先滿意

☆☆☆☆☆☆

為了做好呢個cake

泡芙係我最担心一part

因為要夠硬身

才可以頂起頭上的焦糖

所以事前已經預習一次整個cake嘅做法

泡芙就用不同的譜

做咗五次

最後得blog友 “莎莉豪”的小山泡芙食譜

才感到滿意

呢個譜無掃蛋汁

我再參照之前跟Tong做嘅泡芙山食譜

覺得掃咗蛋汁個泡芙會挺身啲

【抹茶泡芙】

[材料]

牛油50g，牛奶65g，清水65g，鹽1g，糖3g，高筋粉40g，低筋粉40g，全蛋2隻

[掃面蛋汁]全蛋一隻
[做法]

1. 清水、砂糖、鹽和牛油混合，放入小煲中煮滾，立即離火。

2. 一次過篩入高筋粉及低筋粉，快手拌勻成一麵糰，再放回爐中，以小火煮約一分鐘，讓麵糰中的水份蒸發，期間要不停攪拌，以免焦底，熄火。

3.將麵糰放入大盆中，以電動打蛋器打鬆麵糰，同時間令麵糰降溫。

4.將蛋汁分三次加入拌勻，每次要確保完全拌勻才下另一次。

5.用刮刀大刀攪拌使麵糰形成麵筋，至挖起來時，麵糰呈倒三角緩緩滴落即成。

6. 用1cm圓咀，將麵糰放入唧袋，在焗紙上唧出所需大小形狀(注意：要在同一位置唧出麵糰)。

7.以200度預熱焗爐，在泡芙面輕輕掃上蛋汁，放入焗爐以200度焗30分鐘即成，再轉150度焗多10-15分鐘。

8.取出待涼，在底部刺上一小孔，用唧袋盛起餡料，用手攞起泡芙，唧入餡料，手感覺下泡芙是否開始飽滿，即停止入餡，放入雪柜冷藏。
[注意]

焗時不可打開焗爐門，否則會因熱力退減，令麵糊無法膨漲成泡芙

[泡芙餡~抹茶卡士達奶油]

牛奶250ml，砂糖50g，雲呢拿香油適量，低筋粉30g，綠茶粉5g，無鹽牛油20g，蛋黃三隻

[做法]

1. 蛋黃加入砂糖25g，打發至稍微變白。

2. 將低筋粉篩入拌勻。

3. 將牛奶及砂糖25g放入小煲中，以中火煮熱，加入雲呢拿香油。

4. 趁熱撞入蛋糊中快手拌勻。

5. 過篩，再放回煲中，以中火加熱，一邊快手攪拌至奶油糊變稠，至可見到煲底狀態，離火。

6. 加入無鹽牛油拌勻。

7. 完成後將卡士達奶油倒入小碗中，在奶油醬上鋪上一層保鮮紙，以免面層結焦變硬。

8.待涼後，放入雪柜雪凍才唧入泡芙中。




☆☆☆☆☆☆☆☆☆☆☆☆☆☆☆☆☆☆