2008年8月25日星期一

【檸檬茶蒟蒻凍】~ 附食譜


~檸檬茶蒟蒻凍~

[紅茶包3個,檸檬汁1個,糖60g,蒟蒻粉10g,水1000ml]



呢個份量係我失敗咗之後改嘅,我係跟"yen之廚房"裡的份量做咗一次,點知一煮啲蒟蒻粉就知出事,立刻去睇一睇蒟蒻粉嘅包裝,原來用10g加1000ml水架,我用咗50g所以成煲都煮到一舊舊呀!可能呢隻粉係咁,唔關人地嘅事架!跟住想整靚啲,切咗啲檸檬片放係杯底,但又失敗,因為啲檸檬片浮番上面!仲有仲有我就犯咗同一個錯誤,就係無隔個啲茶葉,啲黑色嘅點點就係茶葉!



[做法]
1. 紅茶包用500ml水煮滾,焗5分鐘。

2. 檸檬搾汁隔渣。

3. 用冷開水逐少倒入蒟蒻粉拌勻,用大火煮10分鐘,期間倒入糖煮至溶入。

4. 加入檸檬汁拌勻,倒入啫喱杯待涼,放入雪柜雪凍。




後感:我覺得啲蒟蒻粉好難控制,如改用魚膠粉(2湯匙)代替。兩種唔同嘅食法,前者會硬啲爽啲;後者會似啫喱咁,視似自己的喜好,我都係鍾意後者多啲!

8 則留言:

  1. 我又係經常去九龍城街市買餸架 , 我覺得你好可愛呀!
    [版主回覆08/25/2008 11:28:00]多謝你來訪!點解你用"可愛"來形容我嘅?

    回覆刪除
  2. 多謝你來訪!點解你用"可愛"來形容我嘅?

    回覆刪除
  3. 因為你整呢個 蒟蒻凍睇錯分量溶水, 又唔記得隔茶葉, 好似我D細路做野有時大意我地就用可愛來形容佢地 . (你唔好嬲架呵)
    以前D細路做錯野我係好嬲嘅, 但我老公成話呢D係佢地可愛嘅地方......
    [版主回覆08/25/2008 11:57:00]哦!我係好大意嘅人,可能年紀大!我唔會嬲,我好開心有人咁形容我呀,好得意!哇你老公可以咁仲可愛啦!你有幾多個細路呀?

    回覆刪除
  4. 2個.
    [版主回覆08/25/2008 12:17:00]同我一樣,而家我幾乎係屋企最矮嗰個啦!

    回覆刪除
  5. 1. 紅茶包用500ml水煮滾,焗5分鐘。
    咁紅茶幾時落呀?
    [版主回覆08/26/2008 09:58:00]可以凍水落!

    回覆刪除
  6. 你既檸茶凍好靚啊,我鐘意你加左果片檸檬,好有美感啊﹗
    我既蒟蒻粉係二德曳度買,佢既份量果然同你呢包既唔同呢,不過好欣賞你識執生,即刻令d檸茶蒟蒻番生﹗好厲害啊~
    雖然大少爺可能唔識欣賞我地既檸茶少甜,不過相信你既努力,你d囝囝囡囡老公仔都一定會感受到架~
    多謝你常常捧我場,我都會多d黎捧你場架喇~加油啊﹗

    回覆刪除
  7. 蒟蒻粉我買唔到呀~
    [版主回覆08/29/2008 11:35:00]買唔到蒟蒻粉可以改用魚膠粉,用多少少就得!

    回覆刪除
  8. 如先用500ML焗紅茶包, 餘下500ML就會係冷開水逐少倒入蒟蒻粉拌勻與糖煮至溶?
    另外, 如果我想整士多啤梨果涷, 唔用蒟蒻粉改用魚膠粉, 份量比例係點? 士多啤梨汁1000ML落魚膠粉(2湯匙)代替?? 因為我想入面加粒車厘子. 唔該~~
    [版主回覆09/10/2012 16:20:07]2湯匙魚膠粉即24克

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^