2009年12月8日星期二

肺腑之言!!!

7~Dec~2009(一)


天陰有雨


落咗雨天氣又涼咗唔少啦!




"肺腑之言"


講一個屬於我自己嘅故事


升中四那一年暑假


我無法完成暑期的book report


(當年英文對我來說,真的好難,亦無人可以請教,祇靠自己估下估下)


見細妹已停學出嚟做事


好似幾好咁,有錢使又唔使咁煩


就開口同媽子講


"不如我都唔讀書啦"


(我以為媽咪一定應承,因為可以多一個人搵錢)


點知媽子話"讀到你就讀啦,一個唔讀兩個又唔讀咩"


當時我都好感動


就因為媽子呢句說話


唯有繼續咁捱落去


終於俾我捱到中學畢業!


而家我明白媽子當時都好難受


邊個父母唔想子女讀多啲書呀?



事實


當年不是媽咪要我繼續學業


我就唔會捱到中學畢業


就唔會搵到份咁穩定嘅職業


亦唔會有咁穩定嘅生活


我好多謝媽咪


呢件事我好少同人講過


(都唔知有冇講過啦)


 


近來仔仔成日出街


已經到我無法容忍嘅地步


昨日難得係一家人茶聚嘅時候


我同大老爺同仔仔傾咗好耐


一餐茶由11:30飲到2點


我倆都不停咁同仔仔分柝


我亦將以上的故事


同仔仔分享下

好想講出嚟佢會明白

可惜佢唔知收到幾多 


我講到一半都講唔落去


喊咗出嚟


我真係好無用


講少少嘢都講到咁



仔仔嘅心態


已被同輩嘅思想所佔據


兩老講嘅佢都聽唔入耳


硬說自己的一套人生哲學是對的


好彩仔仔都係一個有耐性嘅人


雖然聽唔入耳


佢都會繼續咁聽大老爺講


(佢真係好錫呢個老豆架)


氣氛都唔差嘅!!!



時下年青人嘅想法


真的無法理解


仔仔嘅想法係


雖然知道今年係最後機會


亦明白時間無多


也知道要用心讀書先有進步


可惜朋友一個電話


又出咗去約會


(佢覺得朋友都好緊要)


我明白少年十五二十時嘅想法


荳芽夢個個都試過


可惜今年真的唔係一個合適嘅時候


我曾經勸告過佢


遇到都要hold住先


點知嚟到係無法阻止的!



仔仔覺得


佢呢個年紀要做番呢個年紀嘅嘢


唔做第時老咗會後悔喎!


我都唔明白


唔玩第時會後悔咩


我問佢咁你第時老咗


呢兩年有乜嘢可以值得你自豪呢?


佢都答唔出!


唔通同人講


我玩夠唱夠咩?



多數人


祇會後悔當年無讀多啲書


令生活過得好啲


我倆無法改變仔仔想法


但我地已經盡咗力


大老爺都話佢著晒迷啦!


點算


仲有五個月就考試


就算佢日日讀書


都怕唔會追得太高


何況佢大部份時間


唔係出街就係屋企傾電話



算啦


"將來"係佢自己嘅


我再努力勸佢


都係為佢嘅將來


唔係為咗我


佢成日話佢識諗


就係唔知識諗咗邊一part呢?



囡囡係度聽到


都話亞哥個思想仲幼稚過佢


邊解細妹仲識諗過個哥哥呢


希望妹妹以哥哥為鑑


好好咁珍惜呢幾年嘅讀書機會!


 


 


 

44 則留言:

  1. (Empty)
    [版主回覆12/07/2009 22:03:00](Empty)

    回覆刪除
  2. 2222....因為個驗碼, 輸咗
    [版主回覆12/07/2009 22:04:00]唔係因為你打咁多字咩?

    回覆刪除
  3. 2
    [版主回覆12/07/2009 22:07:00]做咗三姐啦!

    回覆刪除
  4. 我上堂學到既係, 父母一定唔可以以父母身份去同孩子傾偈. 一定要用同理心, 而且要係佢哋既角度出發同佢傾. 試吓用 "您再唔好好把握時間......我怕您會再來不及...." 或者"我擔心您會係臨考試前2個月先真正知道時日不多, 到時再去溫都趕唔切"..
    要以"您既感受"去指出佢既不當行為. "我怕", "我好驚呀" 等字眼. 唔好將您既經歷作為工具. 佢哋會覺得"果個係您, 而佢比您叻, 唔會跟您有同一結果". 反而用您既"感受", 仔仔可能會有感動位. 試吓, 不過唔好太勉強自己. 而且, 仔都咁大, 好有自己一套, 您一下子指出佢不是, 就傾唔落去.
    唔好唔開心, 您已盡力, 一切結果亦非您可以控制. 星期六見到一大班人, 諗吓呢樣, 就會開心d.
    [版主回覆12/07/2009 22:06:00]有大老爺係度,一定係講埋呢啲嘢架,佢從來都無上過啲親子課,佢維持佢舊式的一套! 我都明白唔可以用父母身份同佢講嘢,但要做得到好難,講下講下又講番自己架! 我無唔開心,係担心啫!

    回覆刪除
  5. 當人未到達成熟既階段, 就唔會識得諗自己要行既路, 既然講又講左, 話又話左, 咁就要等佢遲多幾年, 成熟d先, 佢就會知道自己要比人地用多左好多夜晚返學既時間黎追返而家應該要讀既書架喇.
    每個人都年青過, 我又何嘗唔係好似你囝囝咁丫.
    [版主回覆12/07/2009 22:27:00]無辦法,唯有平時多啲同佢傾下計,從旁慢慢勸,又唔可以擺起個父母款! 可惜佢現在一定唔同意你咁講呢!

    回覆刪除
  6. 現在年青人既想法無咁長遠囉…他們無經歷過無書讀、無飯食、他們普遍在溫室保護中長大的、多數父母也不忍心子女受苦、捱餓的!仔女有咁大既後盾做防衛、你講他們還會擔心會捱、怕無錢駛嗎?只有父母怕子女唔開心、無零用錢、無返家吃飯!你諗以上都是父母怕子女、驚子女什麼怕什麼、他們還會可以承擔了什麼呢?還有現今教育制度下、他們最少可接受到中學畢業、最重要既知恥近乎勇也不需要了!體罰也怕被告虐兒;父母既壓力可不少呢?還要為他們擔心啊!請問他們還有什麼壓力呢?
    [版主回覆12/07/2009 22:27:00]所以佢睇嘢好天真,以為搵一份工唔係咁難,又唔聽人講! 祇顧玩樂,咁先叫做不枉此生,真係好羡慕你啲囡囡咁叻!

    回覆刪除
  7. ∞∞∞∞∞∞∞∞∞ Ðädä ∞∞∞∞∞∞∞∞2009年12月8日 上午6:27

    如果阿妹識諗妳就少擔心個啦。慢慢同囝囝傾啦,否則物極必反呀
    [版主回覆12/09/2009 06:32:00]希望係啦!

    回覆刪除
  8. 我當年讀到小學四年班就出黎做童工.好彩後黎去咗讀夜校.不過我覺得朋友嘅意見係最重要嘅.只要識到好嘅朋友.好自然就會向好嗰方面行.如果朋友只掛住玩.你日日講100句都唔及朋友一個電話.到佢大咗就自己識諗.但到嗰時就太遲.後悔都冇用.唉...做父母真係好難...
    [版主回覆12/09/2009 06:31:00]你仲早過我?我小六就開始要做暑期工搵錢做書薄費架喇! 無錯,朋友一句好過我講一百句!

    回覆刪除
  9. 好多时囝囡真的覺得我们老土又长氣,但我對他们説,如果我没有分析给他们听是我的錯,他们听不听或行不行就是他们的决擇,后果自负,我当然是为他们好,而且你已尽了做父母的责任,继续鼓励他,不要放弃,有一日他会明白,迟不迟也是他的责任了!
    [版主回覆12/09/2009 06:30:00]我地唔會放棄架,一有機會都會傾下,希望有朝一日佢會醒覺!

    回覆刪除
  10. 我係因為入錯碼, 所以做咗亞二囉.
    12月13日, mummy of two係唔係都約咗您食晏呀? 有無confirm到?
    [版主回覆12/08/2009 08:51:00]係呀,仲有frances呀! 應該係九龍城!

    回覆刪除
  11. 算啦!現在D細路唔到我地管架!乜都朋友行先!做父母咪只係激壞自已囉!總之佢唔行差踏錯已還神喇!唯有每次佢去街都叫佢小心D帶眼識人囉!(以上是我自己做法)
    [版主回覆12/08/2009 08:50:00]係無得管,佢覺得佢識諗過我地呀!

    回覆刪除
  12. 你媽媽真係識諗!  
    [版主回覆12/08/2009 08:50:00]係呀!~

    回覆刪除
  13. 已經十二月啦,擔心都無補於事,讀書唔代表一切,或者仔仔有其他天份,可以發展傳統教育以外嘅嘢呢,凡事向好嗰方面諗嘛!!!!!
    [版主回覆12/08/2009 08:50:00]做人父母會唔担心咩? 過埋今年至算啦!

    回覆刪除
  14. 可憐天下父母心!
    或者在他會考受挫,可能有所改變!
    [版主回覆12/08/2009 08:49:00]真係要佢撞板至得!

    回覆刪除
  15. 其實他肯坐定定聽你兩老發功,他D定力唔錯……
    有時候〝哦〞係冇用,他地會覺得你唔明!我信改不了他,唯有作出自我調節
    [版主回覆12/08/2009 08:48:00]而家佢就係覺得我唔明! 唯有慢慢同佢傾啦!

    回覆刪除
  16. 其實到咗我呢一代D人都已經唔覺得讀書係咁重要, 因為得來容易, 返學放學只不過係生活模式, 唔返學咪又係HEA响屋企, 又返學又點會識到朋友一齊出街玩丫~~~ 不過諗返以前日日七點鐘出門口返學, 晚晚去到臨食飯先識返屋企既日子真係唔覺得攰, 讀書嗰時淨係本住得過且過既心態, 心諗就算我點玩都好, 考試及格就算對自己有個交代啦! 相比起D書蟲, 佢哋日讀夜讀又係啱啱好及格, 我已經覺得自己好叻架啦! 見到咁既情況就即刻有個好好既藉口自己繼續玩, 到咗考會考嗰時咪知衰囉! 但係呢D冇得怨架, 天生鍾意玩就算曾幾何時知衰都冇用, 知衰完都繼續要玩架! 不過呢條路都係自己揀既, 點難行都要自己面對, 所以你都唔好再為佢D成績或者學習態度擔心, 你再同佢講咪盞佢討厭你哋, 佢大個架啦, 識諗架啦! 你哋既諗法要到佢做咗人哋父母先會明白架啦!
    [版主回覆12/08/2009 08:47:00]佢就係大個,覺得而家係玩嘅年紀,唔通到三四十歲先去玩咩? 咁嘅想你話佢係識諗定唔識諗?

    回覆刪除
  17. 做父母都只係可以同佢地分析利弊 條路要點行 都係靠佢地決定 妳已經做得好好啦  
    [版主回覆12/08/2009 08:46:00]我已盡,無法改變佢嘅想法!

    回覆刪除
  18. 天下父母心都是一樣,今日做父母比以前更難好多~~~希望囝囝明白
    [版主回覆12/08/2009 08:36:00]今日佢覺得自己想法至啱,無法子,唯有慢慢睇住佢啦!

    回覆刪除
  19. 盡咗力..要講亦講咗...希望仔仔真係識諗喇!順其自然喇!
    [版主回覆12/08/2009 08:36:00]多謝你呀 ~我會嘗試同佢再傾!

    回覆刪除
  20. Hope you son will give it a deep thought and understand you.
    [版主回覆12/08/2009 08:32:00]多謝你呀 ~佢而家有自己一套想法,我無辦法改變佢!唯有等佢自己撞板啦!

    回覆刪除
  21. 早晨早晨 ! 而家啲年輕人十個有九個都係為目前的吃喝玩樂 , 不理將來 , 今日做父母比以前更艱難 , 希望囝囝將來會明白!
    妳唔好唔開心 , 妳已經做得好好啦 ! 
    [版主回覆12/08/2009 08:31:00]佢地覺得出社會做事好容易架,唔使讀咁多書一樣搵到錢

    回覆刪除
  22. 你呢篇blog真係我既心聲呀,好有同感!我叫咗囝囝一齊睇,希望佢明白每個父母都一樣,係想仔女既將來會好,唔係淨係我先咁煩.....因為我阿仔成日話我煩呀!
    [版主回覆12/08/2009 08:30:00]多謝你呀 ~我相信每位父母都經歷過,我祇係度舒發下啫!

    回覆刪除
  23. 書到用時方恨少 ,我到後悔當年唔讀書 .
    希望囝囝明白你地苦心 .
    [版主回覆12/08/2009 08:28:00]仔仔現在唔會明架,佢覺得自己諗嘅先係啱! 當年我地無佢地咁幸福,無人補習,無錢重讀,唯有一路搵錢一路讀夜校,都唔係父母迫架!

    回覆刪除
  24. 慢慢黎啦,而家佢地咁嘅年紀,唔話得又唔打得,做事一意孤行,等佢地撞下板先識驚,好似我地大公主叫佢唔好做part time喇,冇時間温習,佢死都唔肯quit佢份工,又話自己識安排時間,到最後成績差咗,先死死地氣唔做份part time!
    [版主回覆12/08/2009 11:47:00]係呀,佢仲要做part time搵錢去街呀,我又唔想俾錢鼓勵佢去多啲街!

    回覆刪除
  25. 講得好啱,我父親也曾對我們三姐妹說,如果邊一位讀到書,就算讀到大學,點辛苦都會供我們讀,因為我爸爸因為家景問題,只能讀到小學六年級,細細個便出來學廚、學師,可惜我們三姐妹只能完成中學畢業,未能達成父親的心願。
    我非常明白你的感受,作為父母希望子女能夠努力讀書,將來出到社會工作,前路會更加容易走(我以前的同事也跟我說,讀好D書,起碼將來條路好行D)。
    我囡囡雖然現在只是二年級,但我也經常灌輸給她知道,要比心機讀書,學到的會是你自己,還有父母們老了,沒有能力再供養你,起碼你自己有謀生能力,現在,我都成日同佢講「書到用時方恨少」,我絕對認同這句諺語。
    少年十五二十時,朋輩之言,確實有力過父母的金石良言,不過,起碼父母已經將自己的經歷告知子女,雖然這一刻還未感受到父母的肺腑之言,但起碼讓他有沉思的時間,好好想一想將來應該如何做。
    [版主回覆12/08/2009 11:44:00]個個都係咁架啦,做父母嘅啲子女自己識諗就無咁煩,太著緊學業又驚佢壓力太大!
    總之養兒長憂九十九啦!

    回覆刪除
  26. 年青人呀!唉,總係有人思想幼稚,有人識諗,識諗會行得比人快,比人順,唔識諗的可能要經過好多波折,條路好難行,作為父母o既真係只能提點佢,聽唔聽都係由佢自己去想,始終佢都係一個獨立o既人。比着當年,你如果唔識諗,唔聽阿媽話繼續讀落去,結果又可能唔一樣。
    佢唔係讀書材料,就唔好大家心存幻想,過埋依年,向實用方面發展,或者可能搵出佢自己o既興趣呢!
    [版主回覆12/08/2009 11:40:00]我知道,就係佢係叻仔,祇係想錯咗方向,唔想佢浪費時間,先會出聲,都知無乜用,但都要嘗試!

    回覆刪除
  27. 佢咁嘅年紀係俾啲賀爾蒙影響,反叛心重,你哋要小心唔好"哦"太多,如果唔係盞佢乜都唔同你哋講,又者乜都要搞對抗去証明佢先係啱嘅。 我阿公生前成日話"懶驢自有懶驢福,又唔見懶驢打出肉"。你哋要做嘅都做哂,以後就要睇佢個人造化喇。 我阿媽話男仔係遲啲開竅, 或者有日佢突然"叮"一聲成個醒哂,自己識諗呢?
    [版主回覆12/08/2009 10:56:00]無錯,我都係咁睇,但有時忍唔住同佢傾下,都唔感哦咁多,怕以後無計傾!

    回覆刪除
  28. 早呀, 如月! 而家d後生好受朋輩影響 ..... 書到用時方恨少 ......我好理解... 我到而家都有後悔當日點解唔比心機讀書 ..... 其實佢唔會聽得入耳, d朋友同學講一句好過你講一百句, 但係你都要話佢知你地想佢點 ...
    我都好明白你既心情, 最後一年既會考, 上唔到中六, 佢條路會行得辛苦d, 長d ..... 但你都控制唔到 ... 因為佢有佢既諗法 ...得閒又同佢傾下計啦 .... 勸下佢啦 .......
    [版主回覆12/08/2009 12:05:00]我地都後生過,由得佢啦,佢條路係佢行出嚟,有幾濶有幾窄係佢自己受番!不過係我心痛啫!

    回覆刪除
  29. 唉!係咁啦,佢地仲細,你自己細過咪又係想過放棄學業?好多野都係要經歷過先學到珍惜,呢點你自己都識講啦。做父母講到幾多就幾多,佢地收唔收到都無法啦。
    [版主回覆12/08/2009 12:01:00]係啦,講極都唔聽得入耳! 我都講過俾佢聽! 所以等佢撞板啦,第日佢先會明白我地今日所講嘅道理!

    回覆刪除
  30. 很認同Mr. Huey的看法, 看來現今我們做父母的. 真的要多上這些有關課程.
    [版主回覆12/09/2009 06:18:00]今日做人父母真係要好好學習!

    回覆刪除
  31. 唉! 媽媽不易為!
    [版主回覆12/09/2009 06:19:00]今天的父母好難做架!

    回覆刪除
  32. 我阿仔而家讀 中四, 佢都係玩多過讀. 成日同佢講要為將來舖路, 讀得唔叻唔緊要, 但要有自己路向, 摸清楚自己想做咩行業, 將來揸筆定揸摌就睇自己的努力..
    [版主回覆12/09/2009 06:20:00]講得啱架,將來係點都係佢自己架!

    回覆刪除
  33. 小朋友係咁架啦~~想當年我都係咁 唔聽佢地講讀好d書,,,,而家自己先黎後悔 又走番去讀書....二幾歲人先黎考會考 不過努力係無分幾時既.....只要明白既話而家都未係最遲 不過仔仔係無女仔諗野咁成熟架啦,,,, 比佢自己碰下釘佢就會明架~~
    [版主回覆12/09/2009 06:22:00]咁要睇佢幾時醒啦!

    回覆刪除
  34. 唔知係唔係啲男仔比較遲熟幼稚啲, 大啲會識諗啲啦 。
    [版主回覆12/09/2009 06:22:00]應該唔係個個男仔都係咁啩!

    回覆刪除
  35. 我大仔前幾日都向我宣布有女朋友啦,我冇反對都19歲囉,不過都係o個句,要以學業為重,佢有應承我,希望佢能做到啦!
    [版主回覆12/09/2009 06:23:00]咁佢都讀到預科呀,我個仔仲讀唔讀得上都唔知喎!

    回覆刪除
  36. 我呀仔又喺會考, 温書心機唔喺時時有, 不過因為我是主婦,可以時時留意佢,生活亦比較有規律, 我平時唔比佢地去街, 週末先可以.而家佢大個左都好自覺, 平日唔去街,因為佢知道我唔鐘意. 你仔仔已經咁大,習慣左自主,要收緊佢自由度唔容易, 要佢自己自願, 日日同佢傾計啦, 等大家都知道對方想法, 試下比個規條佢守,睇下得唔得.
    [版主回覆12/09/2009 06:25:00]主婦真係多點時間睇住佢地架! 我仔仔舊年都無去街架,係今年先咁,我都會搵多啲機會同佢傾,不過一返屋企又返咗入房呢!

    回覆刪除
  37. 而家 d 細路好有自己一套, 就算佢地明知唔啱, 可能都會一意孤行. 作為父母, 當然係唔捨得佢地行咁多冤枉路啦! 不過掉返轉頭, 狠心d 諗, 可能係要行吓冤枉路佢地先會睇得清, 看得透. 唯有等佢自己慢慢去參透啦~
    我覺得你已經係一百分媽媽, 唔好比咁大壓力自己呀!! 支持你!!!!
    [版主回覆12/09/2009 06:26:00]壓力一定有,而家睇佢幾時醒啦!

    回覆刪除
  38. Hello ! 如月 , 一次偶然路過看到你的Blog, 自此天天都要入來睇睇, 我有一個女兒現時讀中七, 明年3月就高考了, 小女今時今日仍拾下拾下, 思想還是十分幼稚, 雖然佢都緊張自己的成績, 但是成日都十分大意 , 錯埋啲無謂嘢, 加上長相平庸 .......唉!!!第日點算? 不過無論佢點都是我最愛的孩子
    [版主回覆12/09/2009 06:27:00]hi,多謝你! 長相平庸又有乜關係呢,有齊五官已經好幸福,是嗎? 唔知係咪女仔係咁呢,我個女都係架!

    回覆刪除
  39. 而家 D 靚仔係咁架啦。 要慢慢教﹐用下眼淚勸佢﹐我同我細佬都係中學畢業之後﹐ 出黎做野後﹐發覺唔係好夠 QUALI ﹐ 之後去外國讀書啦。 我細佬係成日比 D MANAGER 丙﹐ 所以佢要去外國努力讀書。 不過就辛苦個父母要供佢讀大學
    [版主回覆12/09/2009 06:29:00]我都會慢慢教,但眼淚好似無乜用噃! 個個都係出嚟做事受得多氣,先覺得讀書重要啦!

    回覆刪除
  40. 如月,小朋友長大都有自己一套,我哋只好分享自己的意見,收到同接受多少真係睇佢哋喇,七字真言「可憐天下父母心」。
    我家小姐都有拍拖,我哋都有傾吓分享吓,或者我哋有信仰維繫住,所以佢哋都知道自己的界線,咁樣讀書和拍拖都處理得不錯。
    妳都係開心媽咪,得閒同囝囝傾多d,請埋位朋友仔番嚟食吓嘢,傾吓計,或者會有轉機呢!
    [版主回覆12/10/2009 06:40:00]多謝你,每個年青人都係咁! 囡同仔係唔同架,會同亞媽傾心事,我唔會放棄嘅,會搵多啲機會同仔仔傾!

    回覆刪除
  41. 我...我......好感動  希望亞仔明白你一番苦心.
    [版主回覆12/10/2009 06:41:00]佢而家唔明呢!

    回覆刪除
  42. 睇完成篇真係好感慨,希望仔仔明白您既苦心.書到用時方恨少,我都依家都仲好懷念讀書既好日子,可以既話,都希望當日勤力些
    [版主回覆12/10/2009 17:46:00]無啦,佢地唔會信架,乜都聽唔入耳架

    回覆刪除
  43. 我囡囡又係末代會考生,讀書成績都係一般,平時都有社交生活,不過都係喺假期同同學仔去街,幸好未到失控或無節制的地步,畢竟佢每次都會得我同意先至敢答應同學的約會。
    我地做家長嘅邊個會唔擔心佢地嘅學業吖,我同囡囡都講過要好好應付今次嘅會考,講就講唔少喇,但佢可以緊張自己到咩程度我都唔知,或許佢認為自己已盡力,付出的已足夠,可能考試成績最終係強差人意......無論結果係點,都係要年青的自己承受,人生唔會一帆風順,亦出現很多的無奈,那怕有挫折失敗,最緊要係學懂從失敗中去爬番起身,昂苜繼續行前面的道路!
    [版主回覆12/10/2009 17:46:00]無錯,你最明白,女仔始終會乖啲! 我囡囡咪又係咁,hea下hea下咁! 佢地可能太無風無浪,諗嘢太天真但自己又以為自己識諗喎!

    回覆刪除
  44. 依家教小朋友真係唔可以用以前嗰套 ( 佢哋越嚟越聰明), 我個仔今年1.5歲, 我有排捱..... ha ha !
    [版主回覆03/09/2011 11:40:00]
    我已經盡量用最好嘅方法去同佢溝通,而家啲仔仔囡囡真係要以同輩身份同佢地傾計,我仲學緊呢

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^