2009年8月6日星期四

預期中!!!

5~Aug~2009(三)


25C~30C


成日都落雨


好彩天氣都幾涼


但我都行到換咗兩套衫!



會考放榜


終於殺到埋身


一路我都無諗過仔仔可以升上中六


所以無乜壓力


但...始終都抱有一絲希望



一早和仔仔出發


佢居然著埋校服


我:有冇覺得今日係最後一日著校服呢?


仔仔:有!


我:有冇覺得著校服係最幸福?


仔仔:都有架!


人..........往往唔會珍惜現在擁有的


失去........至會覺得係最好!!!


我預備晒所有資料


成袋文件攞足一日!




我係課室外等消息


仔仔收到成績單仲留係課室


同啲同學傾咗半個鐘


究竟知唔知亞媽係外面等得幾辛苦呀


想盡快知佢有幾多分嘛!



終於我忍唔住打電話俾佢


(個距離都係一個課室)


當仔仔話我知個成績時


真係好失望


雖然同預期差不多


但.............總想有奇蹟出現嘛


眼見其他學生可以入到禮堂登記


心中真的不是味道


點解自己啲仔女都唔係讀書材料呢?



最失望嘅係中文都唔會格


其實佢今次中文得一級


係因為個writing度失咗分


作文可能離咗題累事.........


中英都唔合格真係好幣


是但一科合格都會好啲


因為好多學校收中五重讀生要求都好高


操行由其重要



可惜操行得Grade C


死唔死呀)))))


仔仔成日覺得返學唔好早多過五分鐘


好無謂喎


所以往往都因交通問題而遲到


就攪成咁啦!


無法啦,唯有周圍call啲學校


看看有邊間有機會面試啦


今日試過去一間要求分數好低嘅私校


老師攞起張成績表


第一時間都係睇個操行先


一見係C已經擰晒頭


真係好難受


我無諗過操行呢一關咁難過



成朝揸住個電話,call晒有可能嘅學校


有機會都會去見


上午見咗一間唔知乜嘢書院


無初中嘅書院


面試完都係話返去等消息


咪即係無機會!!!



中午返咗屋企抖一抖


(因為有間下午先安排面試)


求其咁食咗個杯麵


打開本學校概覽


幾乎全部九龍學校都搵過


無幾多間有機會攞表


2:00pm去到一間私校面試


有得交表又因為太多人報讀


而臨時提高咗入讀要求


連面試都無機會


真係好失望



即刻搭的士去試最後一間


呢間我聽都未聽過


但校舍都幾好,等咗好耐


好彩仔仔有機會面試


當我係外面等待嘅時候


真係好心急


好希望會收佢


雖然機會唔大


好彩仔仔出嚟話得咗


佢滔滔不絕咁講個亞sir


問佢啲乜仲問佢估下會唔會收佢?


仔仔好坦白咁講機會好微


(呢個係事實)


個亞sir就要仔仔用一分鐘去說服佢收佢喎



安樂晒啦


呢個機會得來唔易


若果呢間私校都唔收


就要去嗰啲收錢學校啦


仔仔對呢間學校好有好感


佢覺得啲老師係用心去聽佢地心事


希望仔仔能夠把握呢個最後機會


亞sir都同佢講


佢唔係呃到佢就得架!



真係無乜幾何


可以陪足仔仔一日


仲傾咗成日計


我都勸告仔仔


佢讀開係男校


呢間係男女學校


所以我同佢講


我知少年夢係點


叮囑佢今年唔可以有呢方面的時間


希望佢唔好浪費時間係男女關係度



跑足成日


五點幾先返到屋企


真係攰到想死


乜都唔想整


call咗大老爺出街


仔仔又約咗同學唔同我地食


我要好好咁休息啦


好彩囡囡唔使考會考啫!


 


 



 


 

48 則留言:

  1. 1
    [版主回覆08/05/2009 21:41:00](Empty)

    回覆刪除
  2. 11
    [版主回覆08/05/2009 21:41:00](Empty)

    回覆刪除
  3. 羊媽,,,勁.... MOONMOON今日都係手震震
    [版主回覆08/05/2009 21:41:00]又手震???

    回覆刪除
  4. 咁即係最後收左未呀? 邊間呀?
    有個幫開我手的青少年, 舊年 0 分, 最後去左當代 repeat , 今年有 5 分. 仲要有 2 科 d. 不過可惜中英數都 fail. 但竟然咁都入到中六. 不過, 呢個年青人好似知衰喇~ 佢話今年要再再再努力. 出年考第三次喎! 希望妳囝囝都可以 '的' 起心肝, 出年再黎過~
    [版主回覆08/05/2009 21:40:00]收咗,係崇正中學! 仔仔都知衰,係怕佢的唔起心肝啫!

    回覆刪除
  5. 今次攞唔到第一唔係我預期中 不過 妳同大老爺無樹就係我預期中啦
    [版主回覆08/05/2009 21:45:00]無樹.....佢就想,今晚食飯我都無同佢講嘢呀,一路以來仔女啲學業都係得我一個人去攪,叫佢去家長會佢梗係話唔去,今晚仲想教訓囡囡,叫佢俾心機會讀,唔係第日邊搵中七喎,你睇呀,佢連三三四學制都唔理解,你知我有幾勞氣啦!

    回覆刪除
  6. 收咗啦??安樂晒lor~~~
    辛苦你陪囝囝過呢段日子啦!!希望佢第時努力啦!!!
    [版主回覆08/05/2009 21:46:00]收咗重讀中五呀!

    回覆刪除
  7. 我祝囝囝有個好既開始!難為天下既母親啊!總有一天他會明白母親的心啊!
    [版主回覆08/05/2009 21:47:00]真係難為我啦,大老爺乜都唔理,樣樣都係我一個人去攪!希望仔仔爭取最後一次機會啦!

    回覆刪除
  8. 如月姐姐,呢個都係好消息喎。
    [版主回覆08/06/2009 09:48:00]早晨‧算係架,雖然唔輕香,但佢呢幾年hea咗咁耐,係時候俾個機會佢,佢誇下海口一定得架,唔好俾我碌佢柵牙呀!

    回覆刪除
  9. 安樂晒
     
    [版主回覆08/06/2009 09:47:00]早晨‧噚晚攰到未夠十點就瞓咗啦,今朝仲係好攰呀!

    回覆刪除
  10. 希望仔仔黎緊一年比心機呀, 盡力而為, 第時考成點都問心無愧呢
    [版主回覆08/06/2009 09:47:00]早晨‧如果仔仔真係用心讀書,能力不及都無得怪佢,出年咪搵過啲專業嘅去讀囉,始終佢未試埋最後一次會考佢唔會心息架!

    回覆刪除
  11. 希望囝囝比心機 ,唔好錯過呢個機會 ,出年到我緊張啦 ~
    [版主回覆08/06/2009 09:41:00]早晨‧你囡囡讀書幾好嘛? 有時讀得好又係好煩,煩點樣搵中六學位,出年我俾啲意見你啦!其實出年我同你一齊又煩多次啦!

    回覆刪除
  12. 古時有陪太子讀書
    現今有陪太子搵學校
    真係難為了媽媽
    辛苦哂
    [版主回覆08/06/2009 09:40:00]早晨‧噚晚攰到未夠十點就瞓咗啦,今朝仲係好攰呀!

    回覆刪除
  13. 且借 岳飛 《滿江紅》中一句,送與囝囝,以作勉勵。
    莫等閒,白了少年頭,空悲切。
    加油呀。
    [版主回覆08/06/2009 09:40:00]早晨‧多謝你! 不過我唔係完全明白呢句喎! 就算浪費呢一年都係值得架,始終完咗佢個夢想,佢做唔到都唔會怪我地,要怪就怪佢自己唔珍惜呢次最後機會啦!

    回覆刪除
  14. 做媽媽真辛苦了, 要好好休息下.
    [版主回覆08/06/2009 09:37:00]早晨‧噚晚攰到未夠十點就瞓咗啦,今朝仲係好攰呀!

    回覆刪除
  15. 我年年睇電視新聞,腦中都會浮現一句話︰可憐天下父母心....
    [版主回覆08/06/2009 09:36:00]早晨‧澳門係咪好啲架?

    回覆刪除
  16. 希望妳仔仔努力讀書!
    [版主回覆08/06/2009 09:36:00]早晨‧希望仔仔知道呢次係最後一次機會就好啦!

    回覆刪除
  17. 唉!真係難為你!
    [版主回覆08/06/2009 09:36:00]早晨‧噚晚攰到未夠十點就瞓咗啦,今朝仲係好攰!

    回覆刪除
  18. 如月姐姐,睇完都替您辛苦 !
    今晚好好休息,希望阿仔快些明白您既苦心呀
    [版主回覆08/06/2009 09:36:00]早晨‧噚晚攰到未夠十點就瞓咗啦,今朝仲係好攰呀! 噚日好多父母都係咁辛苦! 仔仔祇要明白呢次係最後一次機會就好啦!

    回覆刪除
  19. 收左甘妳可以安樂D喇,希望囝囝體會到妳一片苦心LA~
    [版主回覆08/06/2009 09:35:00]早晨‧收咗啦,所以噚晚都瞓得好好,但今朝仲好c攰呀 ! 囝囝比較偏幫大老爺架,因為佢話亞爸唔會講多餘嘢喎!

    回覆刪除
  20. 難为天下父母心,如月啊,今次囝囝应该知道亚妈几偉大吧,他可能口不出声,但心知哪,真是好找到他中意的學校!
    [版主回覆08/06/2009 09:33:00]早晨‧噚晚攰到未夠十點就瞓咗啦,今朝仲係好攰呀! 噚日好多父母都咁辛苦架,不過人家父母一齊出動,我就孤身作戰! 大老爺連囡囡新學制都唔清楚呀,佢真係幸福,乜都唔使理! 都無話仔仔鍾唔鍾意,係私校點都無佢以前間咁好,但佢印象都好好,希望呢度能令佢努力讀書,佢都知呢次係最後機會!

    回覆刪除
  21. 學校收左囝囝你可以暫時放鬆下先啦 ! 我諗你囝囝經過今次之後會醒覺架喇 !
    [版主回覆08/06/2009 09:30:00]早晨‧總算同佢行咗第一步,希望佢努力出年唔使再咁辛苦!

    回覆刪除
  22. 做媽媽真係辛苦喎, 錫番啖先
    [版主回覆08/06/2009 09:26:00]早晨‧噚晚攰到未夠十點就瞓咗啦,今朝仲係好攰呀! 噚日有好多父母都係咁辛苦架!

    回覆刪除
  23. 辛苦晒, 好媽媽
    [版主回覆08/06/2009 09:26:00]早晨‧噚晚攰到未夠十點就瞓咗啦,今朝仲係好攰呀! 噚日有好多父母都好辛苦,你囡囡應該係三三四學生,咁就好啦,起碼唔使經歷呢啲!

    回覆刪除
  24. 恭喜呀,總之有位就好!!!!!!!
    [版主回覆08/06/2009 09:25:00]早晨‧噚晚攰到未夠十點就瞓咗啦,今朝仲係好攰呀! 係呢,你個姨甥點呀,有乜計劃呀?

    回覆刪除
  25. 先苦後甜,MoonMoon 勞心勞力,要多休息 !囝囝加油!!
    [版主回覆08/06/2009 09:24:00]早晨‧噚晚攰到未夠十點就瞓咗啦,今朝仲係好攰呀! 噚日父母都好辛苦,我都有問過仔仔去唔去外國讀(雖然我好唔捨得),佢都唔想,佢好清晰知道自己想點架,做唔做到都仲要睇佢自己!

    回覆刪除
  26. 咁就好啦, 仔仔要加油呀, 總之幫左佢第一步, 以後點行其實都係靠佢自己
    [版主回覆08/06/2009 09:23:00]早晨‧總算定下目標,以後要靠佢自己,既然佢決定重讀,一定要讓佢自己撞過板先知架!

    回覆刪除
  27. 辛苦咗成日,好彩都揾到學校.安樂晒啦.
    [版主回覆08/06/2009 09:22:00]早晨‧噚晚攰到未夠十點就瞓咗啦,今朝仲係好攰呀! 噚日好多父母都好辛苦,不論搵中六或重讀中五都係! 以後要靠佢自己啦,佢係要向自己交代呢,噚日好開心,可以同仔仔傾咗成日!

    回覆刪除
  28. 如月....今日真係好辛苦呀!瞓個靚覺先講啦!
    [版主回覆08/06/2009 09:21:00]早晨‧噚晚攰到未夠十點就瞓咗啦,今朝仲係好攰呀!

    回覆刪除
  29. 早晨早晨!  辛苦咗成日,好彩都揾到學校.真係安樂晒啦.
    可憐天下父母心,你好偉大呀!
    [版主回覆08/06/2009 09:21:00]早晨‧噚晚攰到未夠十點就瞓咗啦,今朝仲係好攰呀! 噚日仲成日好大雨呢,好多父母都好辛苦,我見新聞影到啲父母仲担心過啲細路!

    回覆刪除
  30. 睇到妳既行程同感受都戥妳辛苦呀, 而家總算可安定下來先! 爸爸通常都唔care仔女既成績架啦, 得d亞媽自己受哂咋, 陰公! 妳抖抖先啦!
    [版主回覆08/06/2009 09:17:00]早晨‧而家年紀大咗,行多兩條街都好攰! 噚晚未夠十點就瞓咗啦,瞓到今朝起身都仲成身好攰呀! 可能有我係度啦,大老爺乜都可以唔理,中以為三三四有中七添!

    回覆刪除
  31. 睇左你嘅經歷, 除左可憐天下父母心之外, 我都唔知仲可以講d咩! 你真係一個好偉大的媽媽!
    希望囝囝來年可以努力讀書, 唔好令你再失望啦!
    [版主回覆08/06/2009 10:26:00]早晨呀。噚日係街你隨時都會見到啲好偉大嘅父母!

    回覆刪除
  32. 啲囝囡又點會明白父母苦心,希望佢真係生性,唔好再令你失望。你好好休息吓啦!
    [版主回覆08/06/2009 10:25:00]早晨呀。。。明白啫,要自己努力先得架!

    回覆刪除
  33. 希望仔仔好好珍惜, 只道妳既一番苦心!
    [版主回覆08/06/2009 10:25:00]早晨呀。。。希望佢明白呢次係最後一次機會啦!

    回覆刪除
  34. 做父母真係好辛苦
    有學校收就好LA,希望囝囝會珍惜呢個會
    [版主回覆08/06/2009 10:24:00]早晨呀。總算告一段落!

    回覆刪除
  35. 請問你有整法式甜品 Maraoon 瑪嘉龍的食譜和制法嗎?Tks !
    [版主回覆08/06/2009 20:23:00]Maraoon我仲未試過整噃!sorry呀!

    回覆刪除
  36. 好媽媽 辛苦啦
    希望仔仔俾心機讀 唔使令妳咁操心啦
    [版主回覆08/06/2009 20:24:00]今朝瞓醒仲好鬼攰呀!

    回覆刪除
  37. 可憐天下父母心.......不過,終於放下心頭大石,
    希望您囝囝比心機去讀,好好追回成積,有個好出路~
    [版主回覆08/06/2009 20:25:00]今朝瞓醒仲好鬼攰呀! 希望佢真係知衰,會爭取最後機會!

    回覆刪除
  38. 甘,有冇請埋今日假
    休息多一日呀
    [版主回覆08/06/2009 20:25:00]有呀,不過晏晝又約咗人呀!

    回覆刪除
  39. 囝囝搵到學校算係放低心頭大石啦! 你真係要好好抖吓, 呢幾日你好辛苦架啦!
    [版主回覆08/06/2009 20:27:00]今朝瞓醒仲好鬼攰呀! 希望佢知衰,知道呢次係最後一次機會!

    回覆刪除
  40. 我經常同阿仔講其實唔係人人都係讀書嘅材料, 問題係你自己有冇盡過力啫, 如果已經努力以赴, 但係成績唔理想, 父母唔會責怪佢哋。  但係如果係自己懶散成日掛住打機上網, 成績唔理想就係佢嘅問題喇!  希望妳囝囝會懂得珍惜呢個最後機會喇 。
    [版主回覆08/06/2009 20:29:00]我都明白,我祇係從旁勸告,不過仔仔係聰明仔,祇可惜無心向學啫!若果我知佢地盡咗力我無恕架,但見佢地一日都無一個鐘溫書就梗係嬲啦! 我都希望佢珍惜呢個機會,唔係出年我又要咁撲法啦!

    回覆刪除
  41. 年年會考放榜,d 家長就要好辛苦地幫仔女跑來跑去找學校 ~ 
     
    [版主回覆08/07/2009 08:21:00]早晨呀‧大家都辛苦,小朋友都好大壓力架!

    回覆刪除
  42. 我都明白天下父母心, 更清楚天下既仔多半係凡事不上心. 都係難為亞媽, 不過而家安樂晒囉.
    [版主回覆08/07/2009 08:21:00]早晨呀‧都未必,好怕佢係呢間學校學壞呢!

    回覆刪除
  43. 總算放下心頭大石啦!
    [版主回覆08/07/2009 08:21:00]早晨呀‧暫時定落嚟啦!

    回覆刪除
  44. 真係辛苦你呢位廿四孝媽咪La
    我都同過媽咪揾學校,不過係中一分學校
    同expect個間有出入,結果都揾到死死下
    崇正中學 都係一般,不過你仔仔一定要加油呢~
    囡囡 都係334白老鼠?
    [版主回覆08/07/2009 12:22:00]係呀,囡囡係334老鼠仔呀! 我都知崇正一般,但都叫做正規學校呀,成績就一定要靠仔仔啦!

    回覆刪除
  45. 晚安呀~ 如月 .....好明白妳做mama o既心情, 不過, 囝囝總算乖乖的, 健健康康的成長, 今年唔得, 鼓勵佢下年攞番好成績啦^^
    [版主回覆08/08/2009 06:31:00]早晨呀。而家大老爺仲想遲啲去再問下其他學校喎!

    回覆刪除
  46. 跑足成日, 真係辛苦哂呢個媽媽 ....
    有學校收左, 真係好, 真係個心都會定好多, 仔仔見你咁辛苦, 應該會感受到, 呢一年一定會乖乖讀好書架喇 ...
    [版主回覆08/08/2009 23:31:00]無法啦,我啲仔女都唔係讀書材料! 都無得揀啦,祇係求個學位啫!佢又唔夠資料報自修! 希望佢會爭取最後一次機會!

    回覆刪除
  47. 好佩服你呀!! 你真係做到 200 分媽咪!!
    [版主回覆08/08/2009 23:31:00]5號嗰日周街都係啲200分300分嘅媽咪同爹地架!

    回覆刪除
  48. 在香港讀書唔止D學生辛苦連家長都咁辛苦,我担心D女揸車同識男仔己經頭都大埋但同你嘅壓力真系牛肶同蚊比‧ 我以前在HK讀書都好差架,好采我地一早移民咗黎呢边,我呀媽先冇咁担心咋!
    [版主回覆08/18/2009 08:21:00]無法啦,人在香港咪要努力囉,香港人會承受到香港嘅壓力架啦!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^