2009年1月16日星期五

好消息!!!



15~Jan~2009(四)


好消息


13號晚佢剛剛考完晒試,


仲同我講聽日(14/1~對卷)一定有喜俾我喎!


即係暗示會有好多科唔合格咁話(佢自己無信心囉)!



噚日(14/1)囡囡放學後,即刻收到囡囡CALL,


話有好消息!


佢話中文、英文、數學同通識四科都合格


佢好開心!!!


佢呢班係中文輔導班,所以中文堂係分二個老師教嘅,


囡囡嘅中文係全班最高分喎!


仲有中國歷史都係全班第四!


祇係科學差幾分先合格,


因為科學份卷出咗啲好冷門嘅題目,唔係好識答!


(囡囡今晚叫我將今次考試啲好成績於上blog喎,都唔知羞!)


其實我一早已經打好呢篇blog啦,不過唔俾佢知之嘛!



我聽到都好安慰,


起碼幾乎科科都合格,


其實佢考試期間,返到嚟話份份卷都做得晒,


我都已經放心咗啲,因為最驚佢同我講做唔晒,


做唔晒即係無希望!!!



早一兩個月前,我已經日日提佢要開始溫書,


但佢都當我發UP風,


唔到考試前都唔會拎起本書嚟溫,


佢中二已經係咁,無心向學咁!


到考試又話唔識,我聽到好鬼忟架!


 
 


如果見佢日日溫書,佢攞唔到好成績,


我都唔會忟,因為佢已經盡咗力,


但見佢日日都咁得閑,

書都唔多睇,


做亞媽嘅就會好忟!



我其實要求唔高,祇要佢地適當咁溫書


成績科科合格我都好滿意啦!


 


而家又要担心個仔,佢今年會考啦,


又係唔讀書嗰隻,


都唔知點算,


又要搵定後路,唔使到時亂晒籠!



噚日,囡囡仲同我講咗一件事,


佢有個舊年同班的同學離世,


每當我聽到有啲咁後生嘅細路唔係度,


我個心都會實晒,


十幾歲女仔,乜都未試過,咁就病C咗,好可惜!


佢病重時仲同佢亞媽講,


好想見下啲老友,

可惜同學都在考試,


學校都要待個考試完咗先同啲同學講,


所以都未能還佢心願,


真係好婉惜一個小朋友咁就離世,


我都登佢亞媽傷心!唉......................




之前同事定過呢隻烏冬,


食過之後覺好好食,今次再定多幾pack,


每pack都係$27!



呢隻烏冬真係超滑架!



天氣咁凍,就學師奶仔咁,


整個肥牛雜錦鍋!



 

42 則留言:

  1. 1
    [版主回覆01/15/2009 21:02:00]好嘢,又係你!恭喜!

    回覆刪除
  2. 1
    [版主回覆01/15/2009 21:02:00]遲咗少少少咋!

    回覆刪除
  3. 2.........
    [版主回覆01/15/2009 21:02:00](Empty)

    回覆刪除
  4. 第一
    [版主回覆01/15/2009 21:03:00]好開心呀?

    回覆刪除
  5. 今日中午我地都係食烏冬..不過冇你咁多材料......間中食下粉粉麵麵都幾好.......
    [版主回覆01/15/2009 21:12:00]我地個個星期四都係煮麵架!

    回覆刪除
  6. 你囡囡無一早溫書,但成績又咁好,其實好聰明呢~~~如果佢再努力D,一定有更好成績喎!!!
    [版主回覆01/15/2009 21:13:00]如果佢再努力啲一定有好成績.............我都知,如果唔係都唔使早兩個月已經提佢溫書啦!

    回覆刪除
  7. 恭喜囡囡考到好成績~叫佢繼續努力 !!!
     
    [版主回覆01/15/2009 21:19:00]佢都好意外,考完卷都無乜信心,但出嚟都唔錯!

    回覆刪除
  8. 信心真係好緊要~我個囡考試都係無信心架!!
    [版主回覆01/15/2009 21:35:00]佢小學時因為係細女嘅關係,讀得好辛苦又唔開心,因為成績唔係咁好,所以俾同學排擠,我都登佢辛苦!但嗰時仲要成日俾大老爺話佢蠢,你話我幾難做,大老爺真係唔識教仔女的,我仲要粗心多一個大細路! 所以囡囡一路以來都覺得自己好蠢,我點樣鼓勵佢都無用,今次我都無抱好大期望,因為佢真係無乜點讀書,能得到咁嘅成績我已經好滿足,起碼佢有番啲自信心! 所以佢成晚都要我將呢件事上BLOG!

    回覆刪除
  9. 恭喜,恭喜.成績咁好,有咩獎品呀?
    [版主回覆01/15/2009 21:54:00]成績都係一般咋,不過叫做科科都合格(除咗科學)! 奬.........我錫咗佢啦!

    回覆刪除
  10. 既然佢有呢D經歷~妳就用今次嘅成續鼓勵佢
    比多D信心佢!!!
    努力呀 !!!
    [版主回覆01/15/2009 21:54:00]我會啦,不過驚大老爺搞破壞咋!唉...................

    回覆刪除
  11. 真係要做父母既先至會感受到你份喜悅同擔心
    依家尼一代唔同我地果陣時
    可以話係幸福, 亦可以話係辛苦
    做家長既除咗自己既事要粗心外,
    還要關顧埋小朋友既現在及未來
    實在好大壓力,
    今次可以得到好成績,
    好相信父母及女兒既壓力都可輕一點..
    在這方面真心替你高興呢.
    ****
    我地又何嘗唔係臨急抱佛腳既人呢 ?
    其實佢肯認真咁去溫書
    都巳唔係太差
    我好明白你見佢近考試時才溫書既心情
    ******
    但現今小朋友時間太唔充裕,
    好難平衡日常功課, 學習課內外及溫習
    還有社交圏子
    ******
    至於同學仔既離開,
    實在是一件很可悲既事實
    學校方面,
     我覺得做得太不近人情
    這是因不想拉抵學校成績
    還是真的為學生好嗎 ??
    現在眾人心裡都抱有永不磨滅的遺憾
    不是傷害各人更深嗎 ??
    在十年前的一個好朋友離逝,
    到今時今日我還清楚記得
    他的聲音, 我還記得好清楚...
    ****
    *
    ****
    另外什錦沙煱係你要在鑊煮好晒才放材料,
    定係放好晒材料在沙煱內,
    才開爐煮呢 ??
    我都好想試下弄這菜, 好方便呢 ~!!
     
    [版主回覆01/15/2009 22:09:00]佢能肯定自己已經係一件好事呢! 而家啲細路都唔知話佢地幸福定係不幸,我地以前邊有咁大壓力呢! 我而家諗起佢個同學臨走之前都見唔到自己嘅老友,真係心都實埋,可以想像佢媽咪有幾傷心,由其是係同自己囡囡咁大嘅一個女仔呢! 個砂鍋啲材料係用另外一個小煲,將材料逐樣煮好放進去的,因為每樣材料要煮嘅時間都唔同,唔可以一齊放入去,你放好之後再滾一滾佢就得!

    回覆刪除
  12. 我又遟到啦
    囡囡考到好成績  咪放心囉
    我個仔都係咁架 無見佢拎本書睇吓嘅 我都唔哦得咁多 佢自己攪得掂就算數
    我家老爺至叻就話 咪由得佢囉 咁大個 自己識諗喎 激C我
    [版主回覆01/15/2009 22:11:00]佢成績祇係合格啫!唔係乜嘢好成績!佢呢班係輔導班嚟架! 我地都係'常哦'架啦! 哈哈.............點解你家老爺同我家大老爺一樣講呢啲說話架!

    回覆刪除
  13. 啲男人都係咁嘅 我地做常哦 佢地做鴕鳥 逃避責任就真
    [版主回覆01/15/2009 22:23:00]我呢件有少少唔同,成日同我抗衡!我教仔教女,佢就同佢地鬧!話佢地考試實唔得啦...啲咁嘅說話,我為咗囡囡能建立信心,都唔敢係佢面前講啲負面嘅說話,但佢成日開口埋口都話囡囡死蠢! 

    回覆刪除
  14. 可能佢諗住咁樣講反話 D仔女就唔會俾佢睇C 會爭氣考好D呢都未定
    但D細路唔係個個都GET到呢
    我有時都會話佢地 死蠢架
    [版主回覆01/15/2009 22:48:00]唉,總之俾佢激C啦!

    回覆刪除
  15. 恭喜Carrie,妳一定掂哪,加油考个第一回来俾老豆睇。。。
    我地真是要珍惜一切,不止眼前人咁簡單,连可以行,可以走都是个福气!
    [版主回覆01/15/2009 22:50:00]真係希望佢能夠加油呢! 我地真係要珍惜眼前人呢!我好怕聽到呢啲唔開心嘅嘢!

    回覆刪除
  16. 咁就放心開開心心過肥年啦!!
    [版主回覆01/15/2009 22:50:00]係架,放心晒!

    回覆刪除
  17. 囡囡嘅中文係全班最高分,科科合格--->> 聽到都替您開心呢~
    小朋友考得好固然開心,但~即使考得唔好,
    都要叫他們不要氣餒,因為,現今的教育真係好艱深,唉~~
    最重要的是他們有認真的付出過~
    [版主回覆01/16/2009 06:18:00]早晨早晨,Rachel科科A喎,邊有佢咁叻! 最緊要係佢用過心讀書,唔係日日係度睇電視!

    回覆刪除
  18. 囡囡好嘢! 個名叫真打............你古係咪真係手打烏冬呢?睇样好滑呀!
    [版主回覆01/16/2009 06:19:00]早晨早晨,唔知係咪手打咁意思呢?佢唔似香港啲一口粉咁!

    回覆刪除
  19. 女女真係好叻呀~  至於...... 人 每一日 都未知自己係點 將來係點 所以 大家都要開開心心呀~
    [版主回覆01/16/2009 06:19:00]早晨早晨,好,大家都開開心心!記得珍惜眼前人呀!

    回覆刪除
  20. 佢要你話俾全世界知佢考成點,即係話佢都好滿意。咁就OK啦。最緊要個自信心喺番度。 亞女呀,繼續努力,俾心機呀。
    依家做父母嘅,只係想D仔女俾多兩錢肉緊去讀書,成績係點都係其次喇。你個女都話識得驚,我個女唔識架。聽日我個女家長日,派成績表,都唔知佢考成點。
    [版主回覆01/16/2009 08:16:00]早晨早晨,係呀佢好開心好意外!佢從未試過係全班最高分添,佢仲想我post佢份卷出嚟,話俾人知佢答得幾辛苦,成板都係字! 我都希望佢有番啲自信心!祝你好運啦!

    回覆刪除
  21. 早晨!!妳囡囡好叻叻呀 !!!!!
    妳個肥牛雜錦鍋好得呀!! 冬天食最啱......
    [版主回覆01/16/2009 08:58:00]早晨早晨,佢祇係科科合格! 砂鍋幾好架,上枱仲熱架!

    回覆刪除
  22. 早晨呀, 睇完妳篇blog, 真係有開心有唔開心....
    開心既係妳囡囡考到滿意既成績, 妳要多d鼓勵佢呀, 小朋友個個都鍾意聽到鼓勵既說話, 總好過鬧佢死蠢.....我對囝囝囡囡咪又係考試都唔溫書, 話佢又反感, 唔話佢又抵唔住頸.....
    唔開心既係妳囡囡同學仔離世既消息, 睇左我都眼濕濕, 尤其係我地作為父母既, 其實見到囝囝囡囡身體健康已經好開心架喇...
    所以我都唔會比太大壓力佢地, 希望佢地識得諗啦.....
     
    [版主回覆01/16/2009 11:23:00]早晨早晨,我會鼓勵佢架啦!但大老爺~唉~! 係呀,尤其是我地係十幾歲人仔嘅媽咪,個小朋友咁小嘅心願都唔能夠俾到佢,真係難過呢!

    回覆刪除
  23. 做父母最開心就是看到自己仔女進步,我都感受到你那份滿足快樂的喜悅。恭喜恭喜
    [版主回覆01/16/2009 11:23:00]早晨早晨,佢考完試話做晒已經好開心啦!

    回覆刪除
  24. 早晨呀~妳個囡都會自己緊張個成績就好啦,我個仔.....
    [版主回覆01/16/2009 11:21:00]早晨早晨,希望佢會努力啦,你仲要浸多幾年啦!

    回覆刪除
  25. 囡囡嘅中文係全班最高分喎!
    仲有中國歷史都係全班第四! 有咁既成績 好開心 繼續努力 加油 (我N年前會考時 只有中國文學同中國歷史囉C)
    [版主回覆01/16/2009 11:20:00]早晨早晨,囡囡舊年中文差,今年呢班係中文輔班嚟架,教中文時會分開兩班教,即係半班一個老師教! 希望佢繼續努力啦!

    回覆刪除
  26. 有機會的話, 同囡囡好好咁去慶祝一番. 食飯又好, 去玩又好. 並且話比佢知因為見到佢的努力與進步, 所以開心並獎勵佢. 同時, 鼓勵佢可以做得更好, 下次繼續努力!
     
    [版主回覆01/16/2009 11:23:00]早晨早晨,我會奬勵佢!

    回覆刪除
  27. 個肥牛雜錦窩好正呀, 加埋個烏冬. 正
    做媽媽當然想子女好成績, 但又怕逼得太緊, 真係好矛盾
    [版主回覆01/16/2009 11:24:00]早晨早晨,個烏冬真係好正! 我從來都無迫過,所以一路都無好成績!

    回覆刪除
  28. 叫細路溫書重慘過自己讀,佢哋唔識死,第日讀得唔好,又係父母最擔心。我好明白你o既心情呀!
    [版主回覆01/16/2009 11:31:00]早晨早晨,佢地好幼稚架,真係唔識C!

    回覆刪除
  29. 你的開心,我都感受到了. 恭喜你! 今次囡囡有進步,已給她打了個強心針.有番信心,自然有動力繼續努力下去.你有無問過佢將來想做什麼工作呢?要是有的話,就要分析給她聽那份她想要的職業須要什麼條件才可以.然後叫她向著目標進發.
    世事真係有好多悲慘的事會發生,愿我們學會珍惜眼前的一切.
    [版主回覆01/16/2009 11:32:00]早晨早晨,佢今次好開心架!無問佢想做乜,讀好書先啦,不過佢下年選科都有諗過架!

    回覆刪除
  30. 雖然我冇小朋友, 但啲朋友既仔女考試時, 佢地發晒癲架, 仲要放假陪讀架, 仲緊張個細路呢.
     
    [版主回覆01/16/2009 14:13:00]我都有請假監管住佢架!

    回覆刪除
  31. 你囡囡攞到好成績, 真係好值得高興啊! 希望佢繼續努力..^^
    咁細個就.....??  真係好令人傷心, 佢屋企人一定好難受啦!
    個雜錦烏冬好重料呀!! 正!!!!!!!!!!!!!!
    [版主回覆01/16/2009 14:13:00]我會叫佢繼續努力! 要珍惜眼前人! 烏冬好正!

    回覆刪除
  32. Great Job, Carrie!   You should reward her with gift.
    [版主回覆01/16/2009 14:15:00]會啦,佢仲要我將佢呢件事蹟係BLOG度發揚光大喎!俾佢笑死!

    回覆刪除
  33. 真開心呀...阿女成績咁好,我個女都考緊試唔知會唔會好似你個女咁,差唔多科科合格又全班數一數二....
    [版主回覆01/16/2009 15:02:00]嘩......唔好咁講啦,我個囡得中文係咁咋,你呢班成績偏低架!佢仲有科學唔合格架!

    回覆刪除
  34. 系呀我地兩個靜雞雞去架.
    [版主回覆01/16/2009 15:20:00]你仔仔知唔知?

    回覆刪除
  35. 囡囡好叻女喎!!
    [版主回覆01/16/2009 16:08:00]多謝!

    回覆刪除
  36. 佢唔知架.
    [版主回覆01/16/2009 16:09:00]如果佢知係咪唔俾你地去架?

    回覆刪除
  37. 我都 "鄧" 你開心呀 !! 比多 d 鼓勵囡囡啦 .....
    想問下你買果隻烏冬喺邊度買架 ?
    [版主回覆01/16/2009 16:56:00]多謝!我會鼓勵佢架啦!
    個烏冬係同啲批發商定架!

    回覆刪除
  38. 我個囡的註學校社工教我們父母咁問個囡嘅.佢話如果整係叫哋仔女讀好哋書,佢哋係唔會明架.但係,間接話比佢哋聽,如果佢哋有夢想,無論做咩都好,讀好書係最基本嘅條件.等佢哋慢慢去思想下將來要什麼樣的生活...
    [版主回覆01/16/2009 17:13:00]多謝!我有時都會同佢講,將來係乜嘢生活係視乎現在你讀幾多書!

    回覆刪除
  39. 囡囡好叻呀,要繼續加油喔~
    [版主回覆01/16/2009 17:13:00]多謝!我會叫佢繼續努力!

    回覆刪除
  40. 我好明白妳既心情,雖然我無小朋友,但身邊朋友都係好為仔女擔心 ~
    呢只烏冬又唔似出面其他既烏冬哦!  邊度有得賣呀?
    [版主回覆01/17/2009 21:48:00]我地係同批發定架!不過我剛才係吉之島凍柜見有啲類似,不過就貴好多要三十幾蚊,又唔知好唔好食囉!

    回覆刪除
  41. 我個女都係F.2,岩岩考完試,我都好担心,你個女好叻呀~叫佢比心機啦
    [版主回覆01/18/2009 07:18:00]早晨,我個女成績一路都係麻麻地,從來都未聽過佢會全班最高分,今次唔知點解!

    回覆刪除
  42. 如月:我好明白,香港讀書真係超級緊張,我當年俾考試的還要有壓力,真係怕怕。宜家佢地响外地讀書,唯有隔空提吓温習,好正成績都可以,否則我都會緊張嫁!
    [版主回覆01/19/2009 09:51:00]早晨,可惜我唔捨得送佢地去外國讀書,而且都負擔唔起!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^