2008年9月30日星期二

祈福之行(二)

祈福之行(二)



2008年9月28日(星期日)


先睇下我細妹間屋啦!



呢度係屋企望出去嘅環境,都唔錯呀!



屋內!





露台



屋邨環境,上面係會所下面係商場門口,




噚日行咗成日都好攰啦,


今日下午就要返香港,


所以淨係出去商場行下超巿同書店,


呢兩個地方每次返嚟我都一定行架!


我仲買咗五本書!


本本都唔係好貴,有啲十幾蚊咋!


雖然係簡體字,不過都難唔到我嘅!



仲行下佢地嘅巿場(街巿),


又買到嘢喎!




晏晝去咗"食街"蛝晏,


好友指定要係嘅"過橋米線"


老闆係香港人!


佢地嘅氣鍋雞好味架$18一碗!



有一樣嘢好奇怪,一間粥鋪居然有兩枱伙計食飯,


屈指一算,食緊飯嘅有12人,咁仲有啲做緊嘢呢,


咁一間粥鋪(十張枱)請幾多人呀?



呢杯咸檸七好好味呀!




祈福超巿好大,我諗有成萬尺啩,


每次我都要行幾次先滿足,


佢都有一啲香港嘅貨會比香港平少少,


呢種綠茶係大老爺日日都飲,


呢度買$13.5仲有贈品送呀!



下午2:30返香港啦,差不多6點返到屋企!

祈福之行(一)

"祈福之行"(一)



9月26日(五)


三個師奶一放工,就攞起背襄趕車!


我地放工5:33搭6:40車上,


車程大約三個鐘,



上到去都應該係9:30-10:00啦,


所以梗係醫肚先啦!



今次試呢間"一點心",好近車站,



好似茶樓點心一樣,用咭剔點心,


好快就有出籠點心食,


味道都唔錯,又唔係好貴,我地三個人食咗$75。


今次上去唔係好多人喎,中有吉位,


本來我地三個會有一個同陌生人坐,


但因為有位,所以可以兩個人坐一個位!haha..........



係上水大塞車,阻咗好多時間,


一路上又落好大雨,仲行雷閃電呀,


我地都唔敢瞓,傾咗成四個鐘先落車,


真係坐到人都顛呀!!!!



因為有個朋友好心急想按腳,


一落車我地帶埋行李,飛奔去會所按腳,


呢度環境唔錯架,好多香港人都會嚟做沐足同按摩。


睇下我對肥腿,hahaha.........



其實真係好眼瞓,做到成12:30(半夜)坐的士回家,


攪下清潔鋪下牀,成2:00(半夜)先有得瞓。



9月27日(星期六)


瞓醒就要去飲奶茶啦,呢度啲奶茶係港式架,


老闆係香港人,所以啲食物水準唔錯,


可惜地方就細咗啲!


好正嘅港式奶茶!



呢碟炒麵$13,好好味架!



食完早餐,就坐邨巴出廣州,


我地嘅目的地"萬菱廣場",車費$7。



廣州我淨係識去呢度咋,係一個批發巿塲,


好多香港人都嚟呢買貨,


上次個同事帶過我嚟一次,


所以都無乜信心記唔記得點行架!



係廣州的士有好多種顏色,唔同顏色代表唔同公司,


都有成4-5種顏色架!



而家廣州啲巴士都有空調,架架都好多人呀!




好彩都順利去到我地嘅目的地,


海珠廣場,落車嘅係海珠公園,


好奇怪,有人係度教唱歌喎,睇下我兩個好友幾有興趣,


知唔知邊兩個係我朋友呀!(估下啦)



萬菱廣場



本來無諗住要買嘢,但我呢個天生購物狂又點會兩手空空呀,


終於買到個friend叫我唔好買啦!


啲嘢真係好平!睇下買咗啲乜?


呢兩隻碟我好鍾意呀$15




好多好多精品買架!$5隻橡根,比起香港真係平成半呀!




呢啲禮物貨(A5 size),$21.5一打(人民幣),


下次都要買多幾款唔同size先!




買到三點先去食晏,睇緊嘢嘅時候唔覺得肚餓,


去到就好鬼肚餓呀,


呢間啲燉奶好出名好好味。



食完搭三點三車返祈福!


車程都要一個鐘架!


返到祈福又要趕下場,就係去按摩啦!



按咗兩個鐘,真係按到骨都散晒,



又係晚餐嘅時候啦!


係祈福一定去"食街",呢度又平又好食,



我地今次係去"農家菜",


啲豆腐好滑好好好味,四餸一湯$137。





"生日禮物"


呢間買啲木製品好得意,係呢度我收到今年早咗1個月嘅生日禮物呀!


好開心,係呢兩個好友送嘅!



呢幾隻木製貓係我嘅最鍾意嘅!


自從係泰國買過啲木製嘅貓我就愛上了它!



另外一份係杯墊,亦都好靚!



佢地見我鍾意,梗要買俾我喎!


真係好高興呢!!!


真係多謝晒呀!