2008年12月7日星期日

唔捨得!!!



我每次參加別人的婚禮,


當每對新人講感受嘅時候,


不論佢地係我朋友、同事或者係親戚,


我都會聽到喊,


我好感性的,當佢地多謝父母養育之恩時,


我都會眼濕濕,


可能自己都係人家父母,


做父母嘅心情一定最清楚,


噚晚,我姑奶嫁女,


我姪女未講嘢我都已經眼濕濕,


好彩無喊啫,醜C人啦!


 
 


我地一家同姑奶關係好密切,


囝囝囡囡由滿月已經交俾姑奶揍真至中學為止!


每日我地返工就會放低囝囝囡囡俾姑奶照顧,


姑奶都照顧佢地十幾年!



囝囝囡囡視姑媽為第二個媽咪,


囝囝仲極之尊重佢姑媽呢!


囝囝囡囡同四個表哥表姊感情非常之好﹐


有時間都會約埋一齊去玩,


聖誕節又會一齊交換禮物!


而家每個星期五仲會去姑媽度食飯,


順便聚一聚!




今朝,

同大老爺食早餐時,


講開姑奶一定唔捨得個女,


我都講到想喊,幾乎講唔出口!


我同大老爺講,將來如果囡囡嫁得出,


我一定會喊到C!一定會好唔捨得呢!


點解我咁易喊架!!!!


 



下午,同囡囡出咗花園行,


想同佢買番啲凍天衫!


行過花墟,

見到檔買皮蛋的檔口!



之前經過都無機會買番嚟試下,


呢檔皮蛋係糖心架,仲好大隻,十蚊有五隻,


今日一定要買番嚟試下!


  
  


之後仲行埋呢四層嘅繽紛,


真係好多嘢睇,仲有好多聖誕裝飾買!



 



囡囡今日大豐收

我荷包就大出血,


居然買到十蚊都無!


佢買咗好多嘢,衫褲鞋都買齊,


之後我地就大包細包咁返屋企!


今日仲係好攰,都要早啲休息lu!



 


 


 

29 則留言:

  1. 又係我呀
    [版主回覆12/06/2008 22:46:00]使唔使兩次呀,小丸子唔同你玩呀!

    回覆刪除
  2. no.1
    [版主回覆12/06/2008 22:45:00](Empty)

    回覆刪除
  3.  原來我係第二咋 ! 我上星期六又係同二姐去入貨, 大出血......大姐話唔得閒, 所以無去......你真係一個好感性既人呀, 我好易感動, 但唔易喊 !
    [版主回覆12/06/2008 22:45:00]都好呀,第二唔錯喎! 我想喊但無喊!

    回覆刪除
  4. 哈哈~原來師奶仔見唔到我 我就會平日先去花園街架 仲要係一個人先開心架,我鍾意自己一個人行街架,係咪好變態呀
    [版主回覆12/06/2008 22:44:00]同一分鐘,點解話人地見你唔到啫!   我自己行就會平日(星期五),我都唔鍾意同大老爺行架!我唔鍾意同人行,自己行可以快啲咁行完!

    回覆刪除
  5. 我都想大出血,但係亞囡唔肯行街買嘢
    佢系男仔頭嚟架,又唔肯著"群",激C我啦
    [版主回覆12/06/2008 22:42:00]我囡囡好怕行旺角,佢好需要先會叫我同佢行架,佢都唔鍾意着裙架!

    回覆刪除
  6. 我都會架, 去人地婚禮見新娘新郎喊我都好易眼濕濕~ 我好明白你囝囝囡囡同姑媽的感情呀~ 我細個時爸媽都要番工, 將我交比契媽揍, 由滿月揍到入小學~ 佢屋企就好似我第二個家咁!!
    [版主回覆12/06/2008 22:41:00]真係好好感情!囝囝同姑媽傾電話可以傾好耐好耐,同我講多兩句都唔得呀!

    回覆刪除
  7. 快d post你囡囡d戰利品啦!!我要睇...我要睇... 仲有要report埋下隻皮蛋既食後感. ahahaha
    [版主回覆12/06/2008 22:39:00]三條褲四件衫1對boot,1個化粧袋,講就得無影到喎!sorry! 等我下星期食過話你知!

    回覆刪除
  8. 主席,我都中意一個人行街架!!
    [版主回覆12/06/2008 22:38:00]我係仲意一個人行,因為唔想浪費時間,快快趣趣咁行完算數,通常我一個人行一個鐘都夠晒!

    回覆刪除
  9. 囝囝囡囡由滿月已經交俾姑奶
    揍真至中學為止!---->>> 您姑奶真的好難得呢~
    [版主回覆12/06/2008 22:27:00]一方面佢好幫手,另一方面佢都係賺錢啫!

    回覆刪除
  10. 今天下午,我和囡囡都經過花園街到花墟那邊買校褸哦!花園街真是人山人海!
    [版主回覆12/06/2008 22:51:00]係呀,好鬼c多人,唔係陪囡囡咁去都唔會揀星期六!

    回覆刪除
  11. 我年年都會放聖誕樹出來的,但今年要暫停一年啦,因為bb就快出世,我無時間攞出o黎同收埋佢...
    你易喊即係感情豐富囉﹗呵﹗
    [版主回覆12/07/2008 09:40:00]我都有,不過呢兩啲細路大咗,懶咗無攞出嚟!咁你今年唔好攞出嚟啦,費事無時間擺番入箱!出年咪可以放禮物係聖誕樹度俾bb囉!

    回覆刪除
  12. 我姪女一出世便交由嫲嫲湊至小學三年級!家長簽名都是因爺爺同我大姑姐簽名既!後期哥嫂申請到間公屋才接回自己湊、但感情此終不及爺爺、嫲嫲同大姑姐囉!所以我好明白箇中既好無奈既道理!
    [版主回覆12/07/2008 09:57:00]我祇係日間俾姑奶揍咋,放工由大老爺揍番屋企架,我唔捨得俾人揍成日見唔到啲B! 大少咁鍾意姑媽可能姑媽無乜點鬧佢啩!

    回覆刪除
  13. 點解個時間係會變架,我第一果陣個時間係21:07架
    [版主回覆12/07/2008 09:40:00]唔知喎,唔通有鬼?  

    回覆刪除
  14. 聽講話果度皮蛋好正架喎.....仲好難遇到添...
    你真係好彩啦.........!!!
    唔捨得都要架啦..唔係點可以好似你咁整個幸福家庭出黎jack..
    亞媽恨不得將我呢個卅幾歲o既女快d嫁...
    d屎唔捨得都無呀.....陰公.......
    [版主回覆12/07/2008 09:52:00]係咩,我好多次經過花墟,若果係下午多數都會見到架,不過見唔到係因為走鬼喎! 哈哈........咁又係! 你唔好咁講亞媽,你亞媽祇係担心你無人照顧啫!

    回覆刪除
  15. 妳好感性
    我系香港時 返工地點對正花園街 好熟太子道至旺角道之間既花園街
    [版主回覆12/07/2008 09:49:00]咁你有無識過呢檔皮蛋呀,個亞伯都係度擺咗好耐喎!

    回覆刪除
  16. 四個表哥表姐~~~即係姑奶曾經湊六個??~~~太厲害啦!!!
    我生咗b之後又係好眼淺,去親婚禮都會眼濕濕,睇親嗰D宣明會呀,助養非洲兒童既短片又想喊~~~我好儍架~~~haha
     
    [版主回覆12/07/2008 09:48:00]係呀,姑媽都好忙架,表哥同大少都係差兩年咋! 你唔儍,我睇報紙都會喊啦!感情豐富啫!

    回覆刪除
  17. 如月你真系好2喊喎.
     
    [版主回覆12/07/2008 09:37:00]係呀,好鬼醜怪!我都唔知會咁,點知想同老公講下啫,都會講唔出口!再講就喊啦! 你今日點呀,009今日放工啦,叫佢煲粥俾你食啦! 

    回覆刪除
  18. 多謝你呀!我今日好咗好多啦,0侯嚨無咁痛,條脷又沃得,好咗7-8成啦.
    009正系識煲藥,煮即食麵&煲水咋.(佢唔識煮野食架,所以我煮咩佢都話系美食,我一定唔會比佢學識煮野)
    [版主回覆12/07/2008 09:46:00]即食麵,你食米粉啦!無益呀! 咁咪好囉,好過我煮乜都無人讚呀!叻唔叻都無乜分別!

    回覆刪除
  19. 不過009都系要我提先會讚我煮d野架,通常佢食咗d餸一啖,我就會話"系唔系有d野想講呢?"
    你今朝飲咗茶未呀?星期日飲茶要等幾耐架?
    [版主回覆12/07/2008 10:10:00]咁009好聽話喎,唔讚係咪無飯食呀?真係英雄難過美人關!  而家叫緊大少同大小姐起身先出得門口! 我去九龍城通常11:00左右,有時唔需要等,有時等15-20分鐘左右!

    回覆刪除
  20. 我自己就唔容易喊,但一見到人喊、就會不知覺地跟住喊架啦 ~ 
    年尾 & 過農曆年前,我同我老公都好鐘意去行花園街 & 花墟架 ~
    不過呢兩度一般都係人山人海,逼死 ~~ 
    [版主回覆12/07/2008 10:07:00]係呀,我未見人地喊已經想喊啦! 花園街我每星期五都會行,囡囡就好少出嚟! 花墟,我年尾一定嚟買花過年,不過會放假仲要一早嚟買,無咁多人ma!

    回覆刪除
  21. 九龍城---->> 去那兒幹嘛??飲茶??我老公又沒假放了~
    我都唔知同囡囡去邊好~唉~~
    [版主回覆12/07/2008 16:39:00]九龍城...我個個星期日都係嗰度飲茶架! 林生好似好耐無放假囉!

    回覆刪除
  22. 咦?我都好耐無見過皮蛋呀伯,點解佢個檔細佐咁多?唔通真係市道唔好?!
    我同honey以前食完早餐成早都行花墟、花園街,依加好掛住係市區住的日子!
    [版主回覆12/07/2008 17:14:00]通常佢都係下午係度喎,我都見過好多次! 不過因為攞住好多嘢,無買嚟試! 亞伯怕走鬼呀,婆婆負責睇水! 新界有新界好啫!

    回覆刪除
  23. 等我得閒經過都要搵搵皮蛋先
    [版主回覆12/07/2008 17:13:00]我聽聞幾好食,不過未試過!

    回覆刪除
  24. 囝囝囡囡同姑媽感情好好,就知道姑媽湊佢地時真係好O錫佢地,那時候你也可以放心了。如果俾別人湊真係千萬個不放心呢!我好彩那時有爸媽幫手。
    [版主回覆12/07/2008 16:40:00]係呀,話晒係細佬個囝囡!因為係姑媽,我真係好放心放低對囝囡返工架!

    回覆刪除
  25. 嘩!啲皮蛋咁鬼靚,真係引死人啦!
    [版主回覆12/07/2008 22:48:00]應該好食!加碟酸薑!

    回覆刪除
  26. 您地一家咁close難怪唔捨得,因為好似自己嫁女麻!
    [版主回覆12/07/2008 22:47:00]係諗起第日自己囡囡嫁咗都係咁!

    回覆刪除
  27. my blog
    [版主回覆12/07/2008 22:47:00]去咗啦!

    回覆刪除
  28. 我多數見佢係荔枝角道,我記得佢檔野唔係咁細架?!可能係兩個人黎,不過佢點解有牌都要走鬼?
    [版主回覆12/07/2008 22:46:00]我見嗰檔係呢檔咋,我見個婆婆係度睇水,咁梗係怕走鬼啦!

    回覆刪除
  29. 依家花墟都充滿咗繽紛D店,不過我都覺得呢間店做得唔錯,尤其係四層嗰間,要乜有乜,好勁!!!
    [版主回覆12/08/2008 06:38:00]係呀,佢開咗四層我都係第一次行上去嗰幾層咋,真係好多嘢買!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^