2008年12月30日星期二

2008開平珠海澳門之旅(一)


2008開平珠海澳門之旅(一)



今次係同屋企人一行十一人﹐


好熱鬧!


細佬趁細妹係美國返咗嚟,


請我地去玩番幾日!


日的都係想屋企人一齊玩下!


聚一聚啫!!!


都唔會計較去邊!!!!!!!


26-Dec-2008(五)


第一日7點9就集合,仲要係沙田,


諗過度過之後都係坐的士直入沙田,


約埋老豆媽子食過早餐先,


因為個行程要到晏晝先有飯食!


  
  
  
  


出發啦!


見唔見到我啲屋企人呀????



坐直通車經深圳灣口岸過闗!


再轉車去中山先!


 
 
 
 
 


第一站~龍井坊



位於中山長命水村內,村內村民平均都有一百歲以上!


裏面有騎馬,射箭,騎牛車等等玩!



Christina (我的姨甥女)一去到就要騎馬,


仲要揀咗隻白馬!



跟住成團人行過隔離食中山最出名的乳鴿!


每人送碗山水豆付花,話係用呢條村啲長命水做的,


咁食完會唔會長命幾日呢????



啲乳鴿同鯪魚球都好貴,既然嚟到,


都要試下!乳鴿我無試到,啲鯪魚球都幾正!



 
 


第二站~農藝館


得兩個瓜棚,一幢兩層高的平房,


咁就係農藝館???



啲導遊姐姐講唔夠兩分鐘,就要你上樓買嘢,


成團人好似聽書咁,排排坐,


聽咗半個鐘,俾錢飲咗個補湯,


又係叫你買嘢嘅時候,都唔明大陸團都係咁,


一定要你買藥材買茶葉!


石斛~$260


呢啲係石斛花,原來石斛係用呢啲花莖做的!


 
 


等我地影番張團體先!個領隊姐姐~Joey


一見我地影相,就主動幫我地影,


好好人!



 


第三站~食晏~中山三寶宴


唔係好知邊三寶???



我地叫咗呢度最出名的菠蘿包$24一打!


幾得意喎,聽聞好耐,今次係第一次食,


啲菠蘿包餡係有一粒粒菠蘿架!



 
 
 
 


第四站~澳雪西子園


呢個話就話係蘆薈養殖場,


但係就得幾塊田係種囉!


跟住又係買嘢,今日基本上全日都無景點可言,


全日都係俾人搵笨!


每個所謂景點,講唔夠兩句就係叫你入房買嘢!


有冇攪錯呀!一半一半都好,成日啲時間就係咁浪費咗!


其實去得短線團都預咗有咁嘅情況,


但無理由一日都係買嘢架,當我地個個都係水魚咁!!!



 
 
 
 
 


第五站~水雲嶺



一個住有雲南布衣族的村落,


呢個就係布衣族的導遊姐姐,呢個亞姐勁過黃子華,


無一個人唔笑到碌地!!!



唔知佢地講啲嘢係咪有稿呢,佢講嘢好好笑架,


成團人都笑到面仔紅卜卜!


唉~講完幾分鐘嘢,都未知乜嘢係布衣族嘅時候,


又係叫你買茶葉的時間,


我本來淨係想買盒雲南普洱啫,


點知俾咗200蚊人仔佢地,

佢地C都唔肯找錢,


硬要我買咗兩罐茶葉,咁都得!


睇下,買滿300蚊有奬狀架!幾威!!!!



 
 
 
 
 


第六站~遠觀~世界文化遺產的碉樓群


呢個仲搵笨,係坐車途中,零零星星咁見到啲碉樓,


咁就係參觀咗喎!



因為呢個地方成日水浸,啲人起樓會起三四樓,


每層都會有客廳,廚房,廁所同睡房,


若遇水浸會搬上一層住,所以會有咁嘅碉樓形成!!!



最後~入住全新開平香江溫泉渡假村



未分房之前,去咗呢度餐廳食自助晚餐,


一入去已經好勞氣,

個亞姐好無禮貌,


好似我地會呃食咁,俾完票佢地,


又唔數人,掛住同人嗌交,真係唔掂,


當時都係得番我地一團人,領隊話坐定俾佢數又話唔得,


人地企定定佢又唔數!總之不知所謂!



唔知係咪我地太夜去到呢,我地8點去到,佢地收9點,


全部啲食物都唔熱,又差,無乜好嘢食,


你想話自己俾錢叫啲其他嘢都無得供應,


佢呢度淨係得自助餐供應!



第二朝聽領隊Joey講,我地一走咋,


佢地就收晒啲食物啦,佢都都未食完都無人理呀!


 


明天繼續..............


 


 


 


 


 


 

45 則留言:

  1. 1
    [版主回覆12/29/2008 21:21:00](Empty)

    回覆刪除
  2. 2
    [版主回覆12/29/2008 21:22:00]  聽日繼續努力!

    回覆刪除
  3. 3
    [版主回覆12/29/2008 21:22:00]  3仔都唔錯呀!

    回覆刪除
  4. 4
    [版主回覆12/29/2008 21:23:00]  好似又遲咗少少喎,今日唔凍呀,點解沖涼沖咁耐呀?

    回覆刪除
  5. 掛著巡BLOG遲到tim.
    [版主回覆12/29/2008 21:23:00]聽日繼續努力!

    回覆刪除
  6. 哈哈~唔怪得之妳咁勞氣啦,真係好唔掂喎,我都打算新年報個短線玩吓架,而家就要再諗諗先
    [版主回覆12/29/2008 21:25:00]咁你睇清楚個團或者問清楚,啲景點係咪人做啦!好似我睇個宣傳單張都好似無問題咁架!

    回覆刪除
  7. 哈哈~原來有咁多人係後面架
    妳地好嗎 我後生果陣係代表學校出去比賽架(短跑呀)
    [版主回覆12/29/2008 21:34:00]今晚好險喎!又睇下你聽日跑唔跑得出?

    回覆刪除
  8. 跟團去大陸次次都係狂叫人買嘢嘅,所以必須要忍手不買.跟家人去遊行,真是好難得,真開心啊!
    [版主回覆12/29/2008 21:34:00]我有忍手呀!不過呢團就太多啦,一日四個景點都係咁!

    回覆刪除
  9. 講真未睇內容時....見到D相感覺都唔多掂... 睇埋內容中晒.......
    [版主回覆12/29/2008 22:21:00]佢呢個團係我參加過嘅大陸最差嗰團!

    回覆刪除
  10. 如月可以比香檳燴牛尾食譜給我.....主席話你有寫.....
    [版主回覆12/29/2008 22:22:00] 嘿............我唔食牛尾喎,邊度有呀????

    回覆刪除
  11. 嘩~!!!乜咁都得架
    咁你地之後有冇要求出去搵食呢 ??
    ...
    睇尼你地第一日都唔太玩得咁開心喎~!!!
    [版主回覆12/29/2008 22:24:00]點搵食呀   ,我地坐咗成個鐘,路邊兩旁都係黑漆漆架! 都唔係,你睇埋聽日你就知!

    回覆刪除
  12. 妳去咗我家老爺鄉下呀
    吓 嗰碟鯪魚球都要$50 咁乳鴿呢
    而家啲大陸團全部都係咁啦 我之前成日去 個仔連佢講乜都背埋出來呀
    有次阿媽差D俾人坤佢買咗幾千蚊嘢 好彩我醒 一早攞住佢個手袋咋
    [版主回覆12/29/2008 22:27:00]你家老爺鄉下係珠海定中山呀? 我老豆同媽子都係中山人喎! 碟鯪魚6粒$25,乳鴿$35一隻,貴過香港! 但都唔使一日全部行程都係買嘢架? 去呢啲團記得要忍手! 乜你唔係住美國咩?

    回覆刪除
  13. 主席 俾妳1番次 咪咋我型啦
    [版主回覆12/29/2008 22:28:00]聽日一定係你攞第一啦,秘密呀!

    回覆刪除
  14. 我誤會了.....SORRY....我睇錯TIM......
    [版主回覆12/29/2008 22:50:00]咁不如你教我啦!

    回覆刪除
  15. 睇嚟好似全程都坐咗好耐車喎..... 香港去完中山, 之後又從中山去開平, 有無坐到 pat pat 都痛呀!!!
     
    [版主回覆12/29/2008 22:53:00]係呀,仲有樣嘢無講,我呢團有兩大party,呢一個party都係十一人,有兩個細路十歲八歲咁啦! 成程我都覺得佢地無家教,點解? 細路成程都唔停口,仲要好大聲,仲大聲過人地個咪,好彩我地坐前排,如果坐係佢地後,我相信無可能聽導遊小姐講嘢囉! 呢團又唔係淨係得佢啲細路,最攪嘢係佢啲大人都同佢地一齊嘈喎!
     

    回覆刪除
  16. 中山呀 鄉里 不過老爺大D
    我次次都話之佢 D嘢咁C貴 搶咩
    我來之前嘛 來咗5年多咋
    [版主回覆12/29/2008 22:56:00]大家都係中山喎,你係咪係香港過去架? 有啲人鍾意參加啲平團,可以有人安排埋車,酒店食足八餐都幾抵架!

    回覆刪除
  17. 我真係唔識...你很定識整...怏D教我..唔該
    [版主回覆12/30/2008 06:47:00]我唔係樣樣都識架,你睇得多就知啦,等我search下話你知啦!

    回覆刪除
  18. 我係香港人呀  
    跟團唔錯架 去得多同個領隊熟咗 有咩好玩嘅團都CALL咗我先 實有位
    [版主回覆12/30/2008 06:42:00]咁又係喎,領隊都話有啲團友次次都會包團要佢帶! 我以前都有跟呢啲短線團,但我呢啲唔係幾十蚊嗰啲喎,攪到我有啲跟咗嗰啲團嘅感覺!

    回覆刪除
  19. d菠蘿包個樣好得意,你有無留意到?
    [版主回覆12/30/2008 06:40:00]你都可以整喎,不如你諗下點整,成功咪可以教我地囉!

    回覆刪除
  20. 唔怪得之我老公話短途千其唔好參加,會好勞氣,果然無講錯!
     
    [版主回覆12/30/2008 06:39:00]其實我唔勞氣,但唔會再參加美麗華啫,以前參加永安都無咁離譜!但短線啱我地,細妹返嚟但三個星期,細佬都係想一家玩下啫,點知佢呢團咁離譜啫!

    回覆刪除
  21. 我都試過跟隊返國內 唔惦呀~ 我去完3日2夜返黎 第日返工 d同事問我 (你去走難黎呀 )
    [版主回覆12/30/2008 06:38:00]真係同你差不多!

    回覆刪除
  22. 我以為D鯪魚球50蚊6粒,嚇死我!!
    [版主回覆12/30/2008 06:37:00]前面有個2字架!

    回覆刪除
  23. 唔好勞氣 唔好勞氣~~
    其實自由行 應該會好玩D呱~
    鯪魚球好味!!!!有無買中山杏仁餅啊??!!
    [版主回覆12/30/2008 06:36:00]自由行有一樣唔好係,啲車要自己安排! 鯪魚球好味但貴! 無呀,佢無帶我地去買中山杏仁餅呀,我地係澳門買咋!

    回覆刪除
  24. 我同你一樣,唔食乳鴿和鯪魚球… 睇你好似難得離開香港,玩得好開心丫~
    [版主回覆12/30/2008 08:05:00]早晨呀,鯪魚球我食架! 有得離開三兩日梗係開心啦!

    回覆刪除
  25. 石斛--->> 上次都買了幾樽,都寄了回台灣,
    另一樽,食了幾次,便擺了在家~
    結果比我大家姐罵,即時拿了去她家.
    您呢個行程,我都去過幾次,好鬼悶~成日都係買買買的~
    有冇去陳百強個紀念館呀??跟團去國內短線遊,
    我鐘意跟油麻地旅遊,食住都唔錯的~
    [版主回覆12/30/2008 08:45:00]你都去過幾次,係咪美麗華又係咪香江溫泉呀? 無呀,有就唔係咁悶啦! 下次跟下油麻地! 啲藥我試買呀買呀,跟住擺咗係屋企!

    回覆刪除
  26. 一家人出去短線旅行好開心...
    [版主回覆12/30/2008 11:33:00]早晨呀,一家人點玩都係開心嘅!

    回覆刪除
  27. 嘩~ 呢個團好似唔多得咁喎! 不過好在一家人開開心心搭夠.
    否則 ...... 悶死~~~
    茶葉買滿 $300 有獎狀 <-----  
    咁呢個獎應該係比 店主 的, 咁都諗得出, 抵佢攞獎啦
    [版主回覆12/30/2008 11:34:00]早晨呀,佢地話呢啲錢係幫助山區小朋友喎,所以有奬狀囉!

    回覆刪除
  28. 咁我會記住依個團唔好參加喇。比錢唔肯找錢?咁都得?
    有獎狀,無獎品,真搵笨!
    [版主回覆12/30/2008 12:38:00]唔好參加美麗華呀,人地話短線係油麻地好啲喎!

    回覆刪除
  29. 月如你過黎睇下E十得唔得.....
    [版主回覆12/30/2008 12:38:00]唔得喎!

    回覆刪除
  30. wow..........個有餡菠蘿包好鬼好食,我好中意食嫁
    [版主回覆12/30/2008 12:37:00]我就覺得甜咗少少!

    回覆刪除
  31. 請問你那個“芝士波”的烤箱溫度是華氏還是攝氏?
    [版主回覆12/30/2008 12:28:00]放入以150度預熱的焗爐中,以170度焗12-15分鐘。

    回覆刪除
  32. 咁岩嘅!我假期又係去左開平, 不過係自由行
    去睇碉樓睇左成日呢~
    [版主回覆12/30/2008 12:37:00]咁你住邊呀,我地個團把鬼,係架車度望下咋!

    回覆刪除
  33. (Empty)
    [版主回覆12/30/2008 13:39:00](Empty)

    回覆刪除
  34. 好開心呀﹗成大班人一齊去旅行﹗
    [版主回覆12/30/2008 13:39:00]成家人去邊都好架啦!最緊要係自己開心,個行程無乜所謂,咪當瞓覺囉!

    回覆刪除
  35. 我住潭江半島酒店, 跟住自己再包車去, 所以可以睇耐d
    [版主回覆12/30/2008 15:19:00]我地好似聽書咁,度度都叫人買嘢!

    回覆刪除
  36. 最緊要一家人開開心心!
    [版主回覆12/30/2008 15:20:00]
    成家人好難得一齊去旅行架!好開心!

    回覆刪除
  37. guess most important is for whole family to be together!  I think I have been to that restaurant you went for lunch, my parents and I went there to pay respect to my grandma's grave long time ago!!!
    Blessed 2009!  Will be in Malaysia till Tuesday,  visit you after that!
    [版主回覆12/30/2008 15:56:00]你又去玩呀???? 一家人難得一齊去旅行,好開心架!

    回覆刪除
  38. 輀到我病病呀
    [版主回覆12/30/2008 16:41:00]你家人對醫生真係好啦!轉流幫襯佢! 你唔係剛剛好番咩?又病?你照顧仔仔同009有冇載口罩呀?

    回覆刪除
  39. 係咪美麗華又係咪香江溫泉呀? 唔係,一次係去陽江,台山,順德,中山,珠海團--->>
    住五星級的陽江溫泉渡假村.
    其餘幾次都係中山珠海團---->>住中山香格里拉大酒店.
     次次都係跟油麻地旅遊,貪佢食住都幾好又平,
    仲有直航船來回~
    [版主回覆12/30/2008 16:55:00]咁我下次試下油麻地先,會唔會好似美麗華咁,一日都係度聽書架?

    回覆刪除
  40. 佢地d菌勁呀!!!!!!!
    無帶口罩呀,我驚佢地唔識得我呀!!!!!!
    [版主回覆12/30/2008 16:55:00]唔識認你都嗅到你陣"徐'啦!   咁你有冇得放假呀?

    回覆刪除
  41. 嘩~~~11個人一齊去旅行, 真係好熱鬧呀!  今個假期一定玩得好開心啦!! haha....個菠蘿包好吸引呀...
    [版主回覆12/30/2008 17:20:00]係呀,好熱鬧!個菠蘿包都幾好食架!

    回覆刪除
  42. 祝如月新年快樂!
    [版主回覆12/30/2008 17:19:00]
    我都祝你年年都咁開心!

    回覆刪除
  43. 無假放!!!!!!!!
    [版主回覆12/30/2008 21:32:00]但係聽日同後日都唔使返喎!休息下啦!

    回覆刪除
  44. 我盡量都參加純玩團,唔係全日入房聽講座都幾煩 ,唔買嘢又黑面!
    [版主回覆12/30/2008 21:33:00]呢個團係細佬全權話事,淨係同我地講去珠海同澳門咋,不過男人報名唔會理咁多架!

    回覆刪除
  45. 一日都係度聽書架?--->> 跟那間旅行社的珠海團,
    都一定有的~因為我地唔買嘢,佢地邊有"下欄"搵呢~~
    [版主回覆12/31/2008 15:35:00]係一定有,不過唔係整日都係囉,全日嘅行程都係喎!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^