2008年11月30日星期日

小blog聚2911~(1)!!!


小BLOG聚


因為得三個人,算係小BLOG聚啦,


開BLOG以來,認識到唔少朋友,


Frances & Rachel都認識咗半年,


係Frances個blog成日都會見到呢個小妹妹,


個活潑可愛,

口齒伶俐,


我真係好鬼C鍾意佢架啫!


之前我地已經見過兩次面,


Rachel小妹妹係一個好熱情嘅小朋友,


唔知點解我同佢好好傾,


佢都幾聽我話架,我同佢好有緣,



唔知係咪自己啲仔女大咗,


見番啲小朋友都好喜歡!


Frances成日話佢煩,我又唔覺喎,


我好鍾意拖住佢隻小手,


一路行一路傾!




十二月三日係佢六歲生日,


我胆粗粗咁應承咗送蛋糕俾佢,


應承小朋友嘅一定要做,


雖然我唔係好識整蛋糕,


都要硬着頭皮整個蛋糕出嚟!



之前烘焙姐姐俾咗個芝士凍餅嘅食譜我,


噚日放下晝假返屋企整餅,


第一步,做個海綿蛋糕先,


呢個都算係我第一個海綿蛋糕,


都算幾成功!



跟住整個cream芝士﹐



加糖打蛋加魚膠加cream芝士,



點知放好個海綿蛋糕,倒入芝士餡後,


好特別嘅情就出現啦,


C啦C啦..........點解片海綿蛋糕會升咗上嚟嘅?


以為片蛋糕唔夠重,嗱嗱聲放多片落去,


點知仲衰,攪到一pat pat咁,


好肉酸呀!救命呀!



有冇人話到俾我知發生乜事呀?




好彩屋企仲有材料,


今次唔敢再放海綿蛋糕啦!


因為再失敗的話,今日就無貨交啦!


用番之前做嘅芝士餅底,


再攪一次cream芝士餡,


雪咗就出去同大老爺食飯,


返到屋企即刻再開工,


其實我有兩種生果想用嚟做餅面裝飾,


士多啤梨同桃,最後都係用咗大路嘅士多啤梨!



士多啤梨芝士凍餅~(詳細食譜)



仲將多餘的啫喱做咗幾杯士多啤梨啫喱杯!



咁個失敗嘅蛋糕點處理呢?


佢係食得嘅,不過醜樣啲啫!


今朝大老爺見到都話唔食,點算?


哈哈...........加啲可可粉係餅面,


咪可以變咗Tiramisur囉!




點知探完Frances返到屋企,


呢個如月版Tiramisu食淨咁少咋,



好彩都有番一件自己試下,


啲cream芝士索晒入啲蛋糕度,


所以淨番啲cream芝士係底部,


所以好似食蛋糕多過似凍餅,


希望整俾Rachel嗰個好味啲啦!

15 則留言:

  1. 可以將個蛋糕反轉佢做底,個面就再掃蛋黃用火燒就已經唔覺啦(不過我想問食落有無問題先 )
    [版主回覆11/29/2008 21:21:00]味道就無問題,如果有問題就唔會銷情咁好啦!   但個質感就似蛋糕多啲.......因為個兩片海綿蛋糕索咗大部份cream芝士!

    回覆刪除
  2. 2
    [版主回覆11/29/2008 21:32:00]都好呀!

    回覆刪除
  3. 多謝您的"愛心旦糕",好好味~"因為它是"輕甜"的,
    合哂河車.
    食評: 滿分~~
    [版主回覆11/29/2008 21:38:00]係咪真架,要講真喎,我要改善架,如果有乜唔好嘅? 我唔鍾意甜,但忘記得咗俾小朋友,應該要正常先啱!

    回覆刪除
  4. 要講真喎,我要改善架--->>> 對我來說,沒甚麼需改善.
    而我剛剛也有問囡囡,如月姨姨個旦糕好唔好食??
    佢也說好好食.其實小朋友也不應吃太甜的,
    因為又凍又太甜的話,好易咳, 現在剛剛好的了~
    [版主回覆11/29/2008 21:54:00]多謝!咁我就放心啦,起碼食得先啦! 聽日去邊度玩呀?仲未諗到?

    回覆刪除
  5. 我鍾意如月版Tiramisu呀.
    [版主回覆11/30/2008 07:55:00]早晨,都係正宗Tiramisu好味,好似你公司嗰啲呀!

    回覆刪除
  6. 真係峰迴路轉,咁都救得番個蛋糕,你係得嘅!!
    [版主回覆11/30/2008 07:54:00]早晨,其實個蛋糕救唔番架,留番自己食,整個樣靚啲,而家咪銷晒囉!

    回覆刪除
  7. 都幾好呀,有兩個食,將錯就錯嘛!邊有問題呢!
    [版主回覆11/30/2008 07:53:00]早晨,無理由掉咗佢ma,又唔係唔食得!

    回覆刪除
  8. 你好醒目啊~~~創出如月tiramisu!!!應該幾好味喎!!!
    [版主回覆11/30/2008 07:52:00]早晨,邊有真正Tiramisu咁好味啫,不過個樣無咁肉酸啫!

    回覆刪除
  9. HAHA~ 佢地把口話唔食 襯你唔係到 食鬼晒呢
    [版主回覆11/30/2008 22:02:00]哈哈....係喎,差啲一舊都無得食!

    回覆刪除
  10. 如月:平時貴師傅教我哋整嘅cream cheese cake嘅cream唔係咁流質呢~ 佢係cream狀,所以唔會比蛋糕索到水份而昇起呢~ 材料度佢會加入埋打起咗嘅淡忌廉呢~
    [版主回覆11/30/2008 22:02:00]哈哈....呢次可能相錯人,九龍城個姐姐咁教我架,我都係試下,點知淡忌廉唔打起真係唔得架,好食,但要做餅底先得!

    回覆刪除
  11. 好驚險喎!又好成功呢!如果唔係點會被偷食哂呢!
    [版主回覆11/30/2008 22:00:00]哈哈....真係好驚險架,諗住整唔到咪買個現盛俾小妹妹囉! 

    回覆刪除
  12. 哈哈, o個頭話唔食, 結果個蛋糕都比人偷食晒! 包裝真係好緊要呢!
    [版主回覆12/01/2008 05:55:00]早晨,估唔到多層可可粉會咁好呢! 

    回覆刪除
  13. 你睇我做 果個 搞笑版,重嚇死你呀!
    你個譜我偷埋喇,下次試做。實在好靚呀!
    [版主回覆12/01/2008 11:46:00]早晨,我都係第一次整咋!記得用餅底做!

    回覆刪除
  14. 早晨呀! 變 Tiramisu ? 真係好掂喎~~~
    [版主回覆12/01/2008 13:46:00]唔掂都唔得啦,之前大老爺話唔食喎咁肉酸!

    回覆刪除
  15. 雖然我係整餅初哥, 但都想講少少.
    我唔知係咪有兩個(或更多)整法, 我見人地多數打起淡忌廉先溝埋落芝士糊度, 咁樣應該唔會浮.
    同埋, 我又見過人地係整餅底 -> 加少少凍餅糊 (用黎黐住個餅底同蛋糕)-> 加海綿蛋糕 -> 加埋其他凍餅糊 -> 加裝飾
    你睇下咁樣↑↑會唔會好 d?
    我自己未加過海綿蛋糕呀~ 不過好快會試.
     
    [版主回覆12/04/2008 22:33:00]好多謝你呀,我之前學的都係打起啲淡忌廉! 但呢個食係烘焙店個姐姐教我架,佢話好正咁我咪試下囉,點知出咗事! 你個用少少凍餅糊個方法都應該行得通,等我試下先!大家一齊努力啦!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^