2008年11月25日星期二

一百分!!!


  




一百分


自問都好想做個一百分嘅老婆,


一百分嘅媽咪!


但係以我嘅性格同EQ真係好難!


我同大老爺嘅性格真係好唔同,


成日都有好多分歧,


"對唔住"三個字,真係從未係佢把口出現過!


有分歧嘅時候,佢實係話我唔啱!


亦深信佢無做錯!


好似上次南丫島事件,佢都有好多理由覺得佢無錯,


咁我仲有乜嘢好講啫!


佢EQ好高,唔會發脾氣(同佢二十年,真係好少見佢發脾氣),


發脾氣嘅一定係我!


咁自然就好似我做得唔啱!


令我覺得好辛苦,好似無人了解我咁!


如果我EQ好啲真係會好啲!


我都覺得自己好易忟憎!



噚日大老爺講咗句說話,


佢話:係咪要佢合埋眼,我先覺得佢好?


佢又話:我成日要佢俾驚喜覺得我好麻煩?


我聽到呢啲說話,

真係無辦法可以平靜!


令我覺得自己係咪要求高呢?


要驚喜都係生日嗰日啫?咁又錯嗎?


係咪自己做得唔夠好?


係咪自己要反省?



我覺得大老爺真係一個好男人,


無壞習慣不煙不酒,


日日都係屋企,又肯做家務,


又係一個好爸爸!


祇係有好多習慣好怪,見解同其他好唔同!


就係咁,所以我地成日都有分歧!



我同佢可謂兩個極端的性格,


我性急佢做乜都慢幾帕!


我最憎人遲到,佢就遲足廿年!


我鍾意浪漫,佢又無咁嘅興趣!


等等等等等............................



係咪要我遷就佢呢,佢又唔會覺得嗰啲係問題,


所以佢唔會改,就算佢覺得係佢嘅問題,


佢都唔會承認的,佢祇會唔出聲,


就係咁,好多時我都無法知佢諗乜!


要我完全當睇唔到,我真係做唔到!


好煩,成晚係度諗,係咪自己做得唔好呢?


不過我諗呢個問題都係解決唔到,


因為一個人係無法解決兩個人存在嘅問題!


 




~菜乾馬碲蓮藕紅蘿蔔茨實無花果豬軟骨湯~(18個字)



~瑤柱蒸蛋~(詳細食譜)


做呢個餸,一定要早一日浸定啲瑤柱!



~毛豆粟米炒肉粒~(詳細食譜)


囡囡好鍾意食毛豆,噚日見到有呢啲一包嘅毛豆,


試下買嚟炒粒粒!



~菜心炒牛肉~



41 則留言:

  1. 1
    [版主回覆11/24/2008 21:16:00]好嘢!  

    回覆刪除
  2. 哈哈~攞晒d第一而家可以沖涼啦 一陣再返黎
    [版主回覆11/24/2008 21:17:00]咁多謝你喎,咁捧場!

    回覆刪除
  3. 2
    [版主回覆11/24/2008 21:17:00]又係差少少!下次早啲啦!

    回覆刪除
  4. 哈哈,攞晒D第二仲已經沖咗涼添,主席我沖涼先過 你呀!!
    [版主回覆11/24/2008 21:18:00]哈哈..........咁你仲有啲乜嘢叻過主席呀?

    回覆刪除
  5. 小丸子 原來如月唔開心呀,妳無乜嘛
    其實妳都好,佢係一路都無變過,咁就包括對妳嘅愛
    但我老公隨著年紀同個性格都一路咁變,亦都包括愛
    [版主回覆11/24/2008 21:30:00]唉,佢成日都係咁架啦!乜都唔出聲!唔鍾意表達!乜嘢都唔會同我講(包括佢嘅健康)! 噚日,佢突然咁講,我先知我唔發脾氣佢都無領情,仲覺得係我唔啱!佢仲作到話問過我係咪生日嗰日先入南丫島! 如果佢錯咗認錯,我真係唔會嬲佢,唔會唔開心,但而家係佢一路仲覺得佢無問題,咁即係話佢覺得係我嘅問題呀,你話我激唔激氣,好心痛呀! 佢仲要投訴我要乜嘢驚喜咁麻煩,咁我應該俾啲乜嘢反應呀? 係咪以後我都唔應該有要求? 老實講,佢真係一個好男人,但係呢方面始終我地都協調唔到! 所以你了解到我點解嗰年會自己一個人去咗淺水灣!因為我想去嘅地方,佢都無興趣去!亦都好想靜靜地自己諗下嘢!

    回覆刪除
  6. 哈哈~盲毛就好似妳個老公咁架,當然都唔會有驚喜俾到我啦,驚嚇就會多,我都係禽日先知道佢要去泰國開會要六日,仲要我聽到佢同個朋友講先知 即刻問你去六日做乜唔同
     
    我 講 妳無問我咪唔講囉 你係有責任同我講架,泰國咁亂唔好去啦,開會開日半玩就四日半,唔去我唔信佢會炒你,佢都無答我,妳話係咪好似呢
     
    我都已經再無氣去同佢講,如果佢覺得開心咪俾佢去囉,知道都改變唔到佢啦,而家d細路咁細單係要照顧佢地都無咁多時間去諗啦,如果我係妳就會搵多d拎自己開心嘅嘢去做啦,由
     
    朝打麻雀打到晚,仲要係兩三點果種,等佢見唔到妳返黎,唔鬼彩佢,一個星期唔煮飯,等佢放工之前就帶晒佢地出去食飯,等佢做獨家老人,絕嗎?我都係係樹發夢咋
    [版主回覆11/24/2008 22:26:00]咁盲毛又係唔啱喎!男人係咪咁架,唔識浪漫係藉口!   娶咗番嚟就乜都唔使做!我成年無睇過戲啦,以前拍拖就個個禮拜都有戲睇! 啲細路細我都好似你咁,無時間諗呢啲嘢,而家反而有好多時間諗埋呢啲嘢! 我唔會打麻雀唔理啲細路架,細個時爸爸打麻雀媽子打啤牌,成日都係得我地幾姊妹好驚架,所以我唔會打麻雀唔理啲囝囡! 如果我做得出咁絕就唔會俾佢激到啦,佢無咁易俾我激到架!

    回覆刪除
  7. 33333333333333
     
    [版主回覆11/24/2008 22:27:00](Empty)

    回覆刪除
  8. 哈哈~我都有入戲院架,睇" 軍曹 "唔知算唔算有呀
    [版主回覆11/25/2008 06:14:00]咪就係咁囉,佢地唔會專登揀戲同啲細路睇!唔通......有細路就無老婆?

    回覆刪除
  9. 我刚回来也有第三真好彩!
    但睇完两次你这篇祗有唉一声無奈,我知你祗是發下悶气而已,一阵就無事,但也为你心痛,不过,我常同年轻人講,人事關係一定有妥协同包容。。。鬼叫我们自己揀个老公咩!但真是比上不足,比下有余,你家老爺长处也不少,不如自己做些驚喜,大家開心更好
    [版主回覆11/25/2008 06:18:00]要妥協...........已經妥協咗不過佢唔理解仲似為我錯呢?妥協咗佢都唔會讚我! 包容............佢仲覺得佢已經好包容我呢! 係.........我都係發悶氣啫,我呢度講嘅祇係小部分,有一些都無講出嚟!

    回覆刪除
  10. 兩個人相處呢門學問真係好深嫁, 可能我地要幾十年後先至可以參透呀!!
    [版主回覆11/25/2008 06:19:00]最幣係得我一個人去學習,唔係兩個人一齊進步呢!你明唔明?

    回覆刪除
  11. 我都發現 任何事 基本上外人睇黎 唔係去睇邊個錯在先 只會睇 發脾氣果個 一定係唔岩在先 時之以久 就會好似 次次都係你唔岩咁 呢一點 我深深咁體驗得到 要對方去為你而改 唔係唔得 係極難囉 加上呢d係佢本身既性格 如果想小d唔開心 小d問題出現既 就為有自己去改變  盡量每件事都唔好去睇得太過緊 咁做人就會開心d架啦  我而家都努力咁去學緊呢~
    [版主回覆11/25/2008 06:23:00]我個囝囝咪咁囉,好彩仲有囡囡了解我! 我已經做咗睇開啲啦,已經遷就主動約佢,你有冇睇10月29日嗰篇?我無發脾氣都無人覺我都得好,佢仲覺得係我錯添! 我改變自己去遷就佢,改到幾時?點解佢又唔可以改變自己去遷就我呢?

    回覆刪除
  12. Mommy dearest 講得好對啊!其實你都好了解大老爺,儘量想他好的方面吧;他不懂情趣,你就自己去營造,最要緊是放開懷抱,唔好想不開心的事,要讓自己每天活得開心高興呀!
    [版主回覆11/25/2008 06:27:00]今次係佢攞出嚟講,我唔知你知唔知10月29日發生嘅事? 嗰日我真係好慘!我已經主動佢,主動約佢,點知佢自己諗咗啲嘢當我都係咁諗,邊有人咁架?成日唔把口同人溝通,誤會咪咁發生囉! 我都想,但有啲嘢日日都發生,令自己真係好煩!有啲嘢佢雖然知自己唔啱,佢都唔會理會我嘅感受,唔會去改的!

    回覆刪除
  13. 兩個人相處唔多唔少都有一定問題架﹐ 而家講完出黎係咪舒服D喇。。。
    [版主回覆11/25/2008 06:42:00]早晨呀!多數都係講咗出嚟舒服啲,兩個人嘅外又幫唔到! 但係問題得我一個人係解決唔到架!

    回覆刪除
  14. Actually all men are the same, they usually don't like to show their emotion to their families, and they like to keep everything to themselves.    And I guess conflicts are part of our lives, we can't live without it,  just take it easy on yourself, then you will be happier.  BTW, pls me when you have a chance today, I forgot the size of the shoe that your son wants.
    [版主回覆11/25/2008 08:39:00]My son's size is 47!

    回覆刪除
  15. 我都知道你對南丫島件事,耿耿於懷喇!
    唔好咁啦!我老公都係咁,佢係一個好老公、好男人、好爸爸,每日放工即刻返屋企,幫手做家務和照顧兩個,同時佢亦係一個好孝順嘅大男人,佢亞媽出一句聲,好過我講十句。尤其是而家老爺走咗,簡直係奶奶大過天,乜都要就晒佢。
    佢哋成家人啲習慣又怪,又唔會尊重和理會我嘅個外人嘅感受。淨係佢亞媽開心就得,我唔開心就話之你,就係你乞人憎、搞事、撩交嗌。
    家家有本難唸的經,我諗,會唔會大老爺咁講,其實佢一早計劃咗嗰日嘅節目,想俾個驚喜你呀?既然咁多年都無變,佢又唔會和唔想去變,咁你只好接受。我知你會唔開心,咁無辦法,人無完美,等於我老公不斷去追求我做到一百分:我肯俾佢媽每星期黎過夜時,佢又要我同佢細妹和好;我答應明年暑假陪佢媽一齊返印尼探親時,佢又想我陪佢媽返教會。佢哋會諗,點解你做咗呢樣,唔可以做埋呢樣?我就諗,點解你委屈我做咗呢樣,仲要我做埋呢樣?
    我都改變唔到我老公同佢屋企人,忍到咪忍囉!忍唔到咪發爛炸囉!做咩要我自己唔開心啫?我都想你哋明白我感受嘛!我咪要講出黎囉!
    遇著你老公呢啲成日唔出聲、唔表態就最惡搞!都唔知佢想點,又唔會講你知佢想點。我老公同我一樣,會嗌交。有時都幾好架!轟轟烈烈咁嗌一場,大家發洩咗,抒發咗自己嘅想法,都好架!
    你如果真係想去南丫島,不如我哋一班BLOG友陪你丫?
    [版主回覆11/25/2008 08:37:00]我覺你個性格比我強!你可以做得出我唔得! 俾驚喜???你係咪講生日嗰日?定係10月29日呀?.......嗰日我無發脾氣,我仲以為佢會內疚.......點知唔係.......佢以為我唔OT就係想生日嗰日去......我話我無咁諗....佢仲作到有同我講過!生日嗰日........無驚喜,仲成個下晏走咗出去買嘢俾我,我唔係想咁呀,想佢陪下我行下街都好,個個星期日都係留係屋企,乜嘢街都無得去! 有交嗌都好......起碼你會知佢諗緊,你講得我個件唔出聲最難搞,我地結婚咁耐好少嗌交,多數得我把聲咋! 我想去南丫島唔係鍾意佢嘅環境,係想...好耐無兩個人去行下,我淨係想同佢一齊行下離島咋!佢都唔明白,自己諗就以為我想星期日(11月2日)生日嗰日同啲囝囡一齊去,試問囝囝同囡囡而家咁大都唔會想同我地去行下啦,佢地會覺得悶架! 忍............忍到佢明白就好,忍咗佢都覺得你唔啱,咁就真係好辛苦!

    回覆刪除
  16. 兩性之間嘅分岐,真係好難分對錯。
    你都話你大老爺係好男人,咁好男人就梗係會喺唔同嘅人生階段,做唔同嘅嘢。如果佢成日好似隻狗咁,喺你身邊轉,你都睇佢唔起啦。
    真係要整板 " 男人心事 ",等你地班太太團,或者可以多D了解個老公。 又或者吸收我嘅失敗經驗。
     
    [版主回覆11/25/2008 09:25:00]早晨呀!咁你真係要整皮男人心事,好等我地班師奶知道究竟男人係點諗? 我十分之了解我老公,佢就係永遠都唔會覺得自己錯呢,你有冇睇我10月29日發生嘅事?佢話佢諗住我唔OT梗係星期日去啦......佢諗咋無同我講呀,唔夠我講又作話同我講咗!好彩啲細路都無聽過?

    回覆刪除
  17. 南丫島..我地頭哦!!
    唔.....原來大家都有咁既問題.........的0的問題真係好煩人...
    [版主回覆11/25/2008 09:54:00]早晨呀!乜你住南丫島咩?

    回覆刪除
  18.  我諗一樣性格都未必係好 有主見配個冇主見 多嘢講配個少說話 我喜歡焗蛋糕 但係我老公從來唔食 一時話熱氣  一時又話食得多會生癌 所以我有時會改整甜品 起碼佢會食 我諗人係要互相遷就 我多事〝傘〞 希望你唔好介意
    [版主回覆11/25/2008 11:10:00]多謝你先! 我都係呻下啫!

    回覆刪除
  19. 男人既, 真係好難講....大部分都係唔會識得浪漫細心......其實妳識佢既時候, 都應該知佢既性格......人都係冇十全十美既, 妳老公都已經有好多優點啦, 又或者咁諗, 如果佢只識得tum妳同浪漫...冇晒其他既優點, 妳情願揀邊樣丫......
    我絕對明白妳既心情, 因為我老公都係唔識 得浪漫既人, 我地都結左婚17年, 佢一份生日禮物都未送過比我呀.....咁我又可以點丫...唯有諗下佢d好野囉.....
    不過佢都好在如果佢唔使返工既話, 無論我 安排咩節目, 佢都唔會say no既...咁當然我亦 唔會諗一d係佢唔鍾意既節目啦, 都係果句, 大家互相遷就囉....
    仲有就係, 妳老公既好處已經多過其他男人好多架喇.....
    唔好唔開心啦, 我仲記得妳就快 結婚20週年....不如妳同妳老公講想點樣慶祝囉, 咁係咪會好d呢?
    [版主回覆11/25/2008 12:05:00]就係見到人地結婚週年去呢度去嗰度,我就無地方去,佢話唔想留低對囝囡喎! 慶乜鬼呀,佢話我要驚喜好麻煩呀!

    回覆刪除
  20. 你吾好要求自己100分呀,一個人做到7/80分已經好好。對自己要求高,對人要求高都好辛苦o架。哎喲,你講你老公好似講緊我老公咁,有八成似,佢都會識得買禮物來tum你開心,我呢?吾駛問啦!真係五隻手指數埋都吾知有無。我同你都係結左婚差不多廿年呀,大家知自己老公姓乜,但吾能夠改變佢成為心目中理想o既人,無可能o架,要一齊行落去,都係要包容同遷就,不過我知講就易,做就難o既。兩個吾同性格o既人一齊,係好事來o架,可以從吾同角度睇事物,而佢亦可緩衝到你o既性格。
    我自己想去o既地方一定會同佢講,佢吾想去一係吾去,一係我自己去,無謂勉強。你老公就係吾出聲,放响心裏面,係吾夠溝通。我都從來無聽過老公講句對吾住o架,諗返起都係一句說話啫,做乜吾肯講呢?但好多男人係咁,可以點呢?我老公以前咁鬼款我都好激氣,後尾諗下如果佢吾care,我咪白嬲,所以好阿Q咁,不如自己開心啲,睇開小小,無謂激親自己。
    我見你真係一個百分百好媽媽好老婆,要維持一個家庭真係吾容易,你日日整咁多野,表達左一份好堅持O既愛,對你好佩服!
    多啲呻下都好o架,有乜講出來,會舒服啲!
    [版主回覆11/25/2008 14:18:00]我就係唔識做亞Q囉! 你覺得係,但囝囝淨係覺得我發脾氣啫! 呻完梗係舒服啲架!

    回覆刪除
  21. 約要人似我除非兩個我,兩個唔同的個體,總會有少許分岐,多d諗佢既優點啦,你當初都是喜歡他的優點才嫁他麻!
     
    [版主回覆11/25/2008 14:22:00]我明架! 但都唔知點解自己點解會嫁佢,拍拖都係咁架我嬲咩,佢唔會氹我架,祇會跟住係我後面,可以由尖沙咀行到旺角佢都唔會氹我架!

    回覆刪除
  22. 你都話大老爺係好男人啦~~
    欣賞佢多D,咁自己都開心D啦!!唔好激氣啦~~
     
    [版主回覆11/25/2008 14:14:00]我會啦!

    回覆刪除
  23. 可必要咁... 你要他咁, 不如反轉你跟他咁呀...其實做人真係好麻煩的, 你一定對, 但價值觀不同, 他不介意失敗...咁你可以點, 其實有時企在他的角度試下呀...有什麼問題呢 ? 不過如果真的會有大問題, 可以同他溝通下, 說出你的角度及問題, 看可否有解決辦法.
    難得有緣喜相蓬,
    天天見君伴身傍
    能有一伴在身傍
    君不見長只目短
    好好想下你我他
    有否煩惱自找來
    望君能夠退一步
    天空海闊徐徐來
     
    [版主回覆11/25/2008 14:14:00]佢就係衰在唔同人溝通,咁我點樣可以反應我嘅睇法呀?又怎可以係佢嘅角度諗呢? 可能我真係"煩惱自找來"!
                                                                                               

    回覆刪除
  24. 難得有緣喜相蓬,
    天天見君伴身傍
    能有一伴在身傍
    君不見長只視短 (SORRY , 打錯)
    好好想下你我他
    有否煩惱自找來
    望君能夠退一步
    天空海闊徐徐來
    [版主回覆11/25/2008 14:24:00]哈哈......你作架? 我就唔係"天天見君伴身傍"囉!

    回覆刪除
  25. 系囉,你嘗試下睇多D大老爺的優点忘記佢嘅缺点,我地mrleung夠冇情趣喇,我咪自己做D自己喜歡嘅事囉,佢個人又囉唆又緊張,不過我個人就大意,有時咪當佢提点我喇.
    [版主回覆11/25/2008 14:25:00]你倆角色好似我倆掉轉咁!

    回覆刪除
  26. 夫妻相處, 真的要互相包容, 試多想想他的優點吧.......
    [版主回覆11/25/2008 15:59:00]我明.........但好難做得到!

    回覆刪除
  27. 好多男人都係咁,冇情趣,左耳入右耳出,總會有少許分岐,但佢起碼唔煙唔酒,準時返屋企,已經好好, *住家男人*我地好難要求佢有D物野,最緊要一家開開心心,平平安安
    [版主回覆11/25/2008 16:00:00]我明......但好難做得到!

    回覆刪除
  28. 囝囝最怕阿爸阿媽嘈,覺得好煩。雖然可能你會覺得吾知點同佢解釋,但亦都可以嘗試講下,叫佢評下理o架,吾好睇少細路,可能佢地心水清啲o架。
    [版主回覆11/25/2008 16:01:00]係呀,囝囝就係覺得煩! 唔企係亞爸嗰邊架!佢嘅觀點都係由大老爺灌輸俾佢架!

    回覆刪除
  29. 人與人相處就係咁呀~ 若要人似我, 除非兩個我. 少點執著, 邊個就邊個都好, 都冇得計邊個做得多做得少, 因為自己眼中一定係覺得自己做左好多野, 另外一方冇付出過或者做得唔夠自己多... 其實佢都有為你改變左不少la, 係咪?! 知易行難, 加油呀~ 咪咁激氣~ 激氣的話, 等自己冷靜左先同佢講, 一定要講, 佢把口唔承認, 個心或者都會肯聽你意見呢!
    [版主回覆11/25/2008 16:54:00]我都好想少啲執著,但好難做得到! 你都講得啱,I will try my best! 但佢唔會同我講呢,有時同佢講嘢,我講成晚佢可能祇會應你兩句咋!

    回覆刪除
  30. 哈哈~其實你嘅心聲 = 好多人嘅心聲~
     
    因為大多數嘅男人同女人嘅諗法係唔同呢,女人感性,男人理性,佢哋係唔會明女人咁多感受呢,只會覺得感情用事,咁多感受咁鬼煩氣呢~
     
    哈哈~我家老爺係一名好男人,但講到情趣, noway la ~ 佢覺得我花弗過佢呢~ 所以我對佢都冇乜要求呢~
     
    想當年拍拖時,佢唔鍾意傾電話, ok ~我可以唔同佢傾電話,佢要讀書考試時,試過三個禮拜先得一個電話,個電話仲係約幾時見面,講完就即收線,問候多句都嫌費事咁添呢~ 哈哈哈~當時我都懶理佢,佢唔得閒我咪約其他朋友去街囉~
     
    結咗婚我都依然保持住呢個放風箏心態,互相心裡面有對方存在就得呢~ 我唔會特別要求佢要點,同埋我會有番我自己嘅社交圏字,哈哈哈~有時明知對方性格係咁,就唔好要求佢改變,唔係棧自己辛苦呢~
     
    其實我家老爺成日想改變我,我都成鬼日吹到佢啤啤聲呢~ Wakakakakaaaaaa ~
    [版主回覆11/25/2008 17:16:00]哇........好長篇呀,多謝你! 你好獨立喎,我係小女人,鍾意男人錫我多啲! 我都唔會周圍去嘅!

    回覆刪除
  31. 哈哈哈~我又老貓燒鬚,漏咗 click 私人回應,攪到好似洗版咁呢 ,呢家野我就唔夠呀主席咁謹慎呢~ Wakakakaaaaaa ~
     
    以前我試過去佢度 post 餸菜比佢睇,又係漏咗 click 私人回應,攪到比佢d朋友以為我挑戰主席呢~
     
    哈哈哈~做小女人遇著個不解溫柔嘅大男人,真係會好辛苦呢~ 不如等我教壞你,等你周圍逛先~
    [版主回覆11/25/2008 20:18:00]乜嘢叫做"洗版"呀? 我唔會介意喎! 你無法帶壞我架,我太正經啦!
     

    回覆刪除
  32. 我覺得呢個世界冇可能有兩個人性格一樣,就算性格一樣做夫妻都未必夾架。兩個人相處呢門學問真係博大精深!所以我都比唔到意見你,不過我聽朋友講過,兩個人相處唔係忍受,應該係接受,我都覺得有道理架。
    [版主回覆11/25/2008 20:20:00]我並不是要佢學我!我明白兩個人無相同嘅! 祇係要佢錫我多啲啫! 相處學問真係好深奧! 要接受...........我會學!多謝你!

    回覆刪除
  33. 我又黎喇..成日睇你個blog都流哂口水!
    你honey身在福中不知福 ~~~有個咁錫佢既老婆
    [版主回覆11/25/2008 20:23:00]真係流口水?咁我知送乜俾你啦!  佢可能覺得好辛苦呢!

    回覆刪除
  34. 多謝你呀如月,你真系了解我啦,知我打字打得好辛苦. 開心d啦!!!!!
    咸魚,原本去主席個街市買,但系放咗工好攰所以無去,去咗屋企樓下個街市買,點知個老細話無得散買,要成條喎.咁我緊系唔買啦,成條食唔細咁要放系屋企????? oh!no!!!!
    [版主回覆11/25/2008 20:48:00]我係咪善解人意呀? 成條?????咁你星期日買定係屋企啦!可以放好耐!

    回覆刪除
  35. NO WAY!!!!!!!!!
    我屋企系唔會放條咸魚系道,容不易有其他生物黎我屋企
    [版主回覆11/25/2008 21:19:00]放係雪柜ma!

    回覆刪除
  36. 你做得好好架啦, 唔好唔開心啦. 兩公婆通常一凹一凸, 如果平心淨氣佢都唔明白, 咁唯有睇開O的, 自己就會開心O的 =) 
    [版主回覆11/25/2008 21:50:00]佢明唔明白我都無法知道架,因為佢乜都唔講!個個都話睇開啲,但我已經將個底線降到好低啦!

    回覆刪除
  37. 我遲咗入嚟,原來大家都有一本厚厚嘅..........."難唸的經"呢!! 簡單講,如果你全部身家有五十蚊,四十蚊買咗屋企嘢,十蚊俾仔女食飯,我仲問你攞廿蚊,你可以俾我嗎????? 凡事都唔可以迫得太緊,仔女大個啦,你喺屋企嘈,佢哋覺得煩,越來越唔想so你,你咪仲慘.................... 為大局着想,算啦算啦!!!
    [版主回覆11/25/2008 21:51:00]我知,但我EQ唔高,一有嘢都會講晒出嚟! 講就易做就好難!

    回覆刪除
  38. 人有好多面既,佢冇情趣,你同佢結婚個日你已經知,唯有接受,如果果個人係你d仔,女,佢冇情趣,你一定唔會唔開心又或唔會發脾氣,
    佢咩都唔講(男人特徵,男人通常呢d時候咩都唔講,只係唔想同你嘈,佢唔出聲,你嘈黎都冇意思,其實喜歡一個人,根本就唔需要佢去改,改左最後又會覺得,呢樣唔好,個樣唔好,做人永遠唔會有十全十美,只有" 不滿足",如果要人改,呢個就唔係佢,性格係冇得改,媽咪都知自己仔女d性格,係甘就係甘。 改咩? 唔洗改,要一個人去改變係好辛苦,又唔係傷害到人,自己喜歡點就點。
    所以你都唔駛特別就你老公,我覺得係你就得佢太多,你而家覺得自己好委屈咯......
    其實可能佢都唔想你就佢,你想食咩,下次照叫....唔駛怕。
    [版主回覆11/26/2008 06:03:00]我知無可能改變佢,但我唔將自己的要求改變,咁我咪日日都好唔鍾意佢,但自己就得多,就會好辛苦,都話就咗佢,如果佢明白而讚下我,咁我會開心好多,起碼都值得囉!而家係做咗人地都唔覺你就佢囉!

    回覆刪除
  39. 我是路過的。聽到你的小小心事,你不要耿耿放懷! 只要你知道他是愛你的,那什麼都不要去計算。其實因為你為頭家做了很多,但他一路都無乜反應。其實你做所有的,個男人都知道,都知你好好 ,就是不愛你多說話。每家的男人多數都是這樣的。 我在這裹祝福你。加油!!
    [版主回覆11/26/2008 10:42:00]我知,多謝你先,我會努力!

    回覆刪除
  40. 妳依家可能已平復了?大家夫妻20年,唔好同佢計較,佢唔浪漫,咁妳攪吓氣氛,男人有時因工作都煩,好難同人傾,妳体諒多d,佢明。
    我大老爺都係大男人,我儘量就佢,免佢依依哦哦,黑晒面之類喎。佢唔鍾意我搞東搞西,宜家除咗煮飯,都冇得玩搓飽.........算喇!一起20年,好頭好尾。
    妳有大把friends,同大家呻吓就成了,一家人要開心才是最重要啊!
    [版主回覆11/26/2008 14:33:00]我都好平復,祇係想呻下啫! 我都要工作,仲係好煩添,咁邊個體諒我啫! 佢唔鍾意你搓包???咁你咪唔可以玩囉! 我同佢無事嘅,祇係自己唔開心啫!

    回覆刪除
  41. 你老公又係嘅...講句咁嘅野..唔嬲就奇la....不過佢覺得自己無錯..咁真係無符架..你星期日咪自己揾節目law...你就到佢咁耐都好叻..
    [版主回覆11/27/2008 06:30:00]早晨呀!我已經無晒符!星期日仲有對仔女架!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^