2008年10月25日星期六

Blog聚(3)下集!!!


Blog聚(3)下集



噚晚好夜先返到屋企,


無辦法寫咁多,


今日起身趕埋佢!



中午約咗MAmiPOHpoh去九龍城食泰國菜,


係MTR等埋MAmiPOHpoh,


因為佢淨係識坐MTR,


我等等下有人係後面拍我,


噢!就係MAmiPOHpoh呀,

佢好叻居然連我個背面都認得我!


一齊坐小巴出九龍城,


之前我已經係網上search邊間好,


終於揀咗呢間


"隆姐泰國美食館"



我地得兩個人,咪叫咗一個粉、一個串燒、


一個炒菜、一個沙律



一入到去祇得兩枱客,真係唔明佢地點樣可以賺錢,


我地坐低時嗰兩枱客都已經食緊,


我地叫咗嘢,好快就嚟咗個沙律,


呢個好普通,唔可以講得好食,


我比較喜歡食金柚嗰隻!


跟住就成半個鐘再嚟個菜


最好食都係呢個~咸魚炒椰菜苗~



又傾下計先啦,同MAmiPOHpoh好好傾,


真係完全無陌生嘅感覺!


又咗半個鐘,問佢地個粉仲未到喎,


佢答我話,都話叫炸雞翼要耐啲啦,



嘿.............炸雞翼............喎,


唔使炸成個鐘ma,隔離嗰枱仲遲我地成個鐘先入嚟,


已經成枱嘢啦,點解我地叫啲咁簡單嘅餸要咁耐,


終於我地用咗個半小時食完呢餐飯,


泰國人呀泰國人,點做嘢架?


如果啲客趕住食晏,得一個鐘點幫襯呀???



跟住就出去油麻地,同MAmiPOHpoh買電子磅,


去咗陳枝記先,買咗小小嘢,


但係見啲電子磅都唔平,


又走咗去二德惠買,嗰度買$110仲有95折,


行完二德惠都倦啦,因為我地都攞住成四份拌手禮呢!


帶咗MAmiPOHpoh去大快活坐低飲杯嘢,


順便等埋Frances,佢已經鬆完骨返咗屋企,


好快Frances就嚟到,Rachel小妹妹我地又見面啦,


佢真係好精靈,我仲有啲應付唔嚟添,



因為Frances話要去買麵粉,


問我附近有冇烘焙店,我地又唔想行去二德惠咁遠,


記得blog友提過信和中心有間新開嘅,


決定去呢間啦!


睇下MAmiPOHpoh揀得幾入神,



\



買齊嘢又出發啦,但距離食飯時間仲有成個鐘,


去咗培正對面公園仔坐下先,



Rachel妹妹叫我同佢玩滑梯,


老人家點玩呀,叫佢同出面個小弟弟玩啦,


佢好快就同個小弟弟玩得好熟,有潛質呢!



晚飯時間到啦,


行上去YMCA座樓,地下就係我地今晚嘅聚會地方,



好幽雅,好少咁樣嘅餐廳,


有小水池,有"千秋",


地方唔大,都有啲擠迫,但你會見到啲人都唔介意,


正在有人在唱民歌呢!



好好嘅一間餐廳,食物水準OK啦,


但位位客人都在聚一聚,


枱枱都係度傾計,個個都享受呢度嘅氣氛!



我好大鄉里架,未去過啲有人唱歌嘅地方食飯,


因為大老爺都唔識帶我去呢啲地方!


坐咗一陣,卓高嚟到,


一位好斯文嘅女仔,好nice,好好傾,


我地一啲都唔陌生,雖然我同佢通blog唔係好耐,


跟位pal都到埋,一個高大嘅男仔,


同Frances形客一樣,好有風度有為啲青年,


(尊重佢地,所以佢地啲相無post出嚟!)


大家傾得好開心,但時間過得好快,


成十點我諗MAmiPOHpoh行咗成日都好攰啦,


我地埋單走人!


亞pal負責送MAmiPOHpoh去MTR站,


而Frances就搭火車,我帶卓高去搭巴士,


而我呢個懶鬼,一舉手就跳上的士,


一個好開心嘅晚上,


一個好開心嘅聚會,



真係好難得,因為MAmiPOHpoh係好少會返香港,


今次咁啱佢回港一趟,


我地先有機會聚一聚,


唔知幾時再有機會聚頭囉!


(唔知你地有冇發現,我地都一齊着咗黑色衫架,


咁呢個約會係咪應該叫"黑色的聚會"呢?)





今次仲收咗好多拌手禮,


雖然亞pal唔識整嘢食,佢都買咗朱古力俾我地。



至於卓高,你啲曲奇真好鬆脆呀,


我今朝做早餐食咗兩塊,好好食呢!



呢盒係Frances精心炮製嘅餅,


我未食,食完話你知!



多謝MAmiPOHpoh嘅三文魚!



 

16 則留言:

  1. 這確是很難得的聚會~~而且~~很愉快~每個都有話題的,
    沒有冷場~~這便是我想看到的"場面"了~~
    希望到天氣轉涼後,我們又可以一起再搞BBQ聚會吧~
    [版主回覆10/25/2008 10:44:00]早晨呀!係呀,個個都好斯文,卓高好好傾,pal好有風度,唔怪得之Rachel對佢............  

    回覆刪除
  2. Rachel小妹妹我地又見面啦,佢真係好精靈,
    我仲有啲應付唔嚟添------->>>我每天都有"應付她",
    您可想而知,我有幾咁身心疲累呢~
    [版主回覆10/25/2008 10:45:00]早晨呀!我老啦,但同Rachel真係好好傾,佢好精靈,你做亞媽捱下啦,佢好快唔理你架!

    回覆刪除
  3. 好愉快既一天呀.....
    [版主回覆10/25/2008 16:44:00]好愉快嘅一天,亦係好攰嘅一日!

    回覆刪除
  4. 三文魚 妳地行咗成日喎,唔怕咩
    [版主回覆10/25/2008 17:49:00]好似沙甸魚咁架,熟咗真空的!今日食咗大半條啦! 囝囝無事啦!

    回覆刪除
  5. 禽晚都無燒架,今朝又101一路食緊葯,所以無去補習,而家訓緊啦,一路食緊白粥
    [版主回覆10/25/2008 18:01:00]多多休息就好快好!

    回覆刪除
  6. 真係一個好開心既 blog 聚呀 !
    [版主回覆10/25/2008 22:55:00]係呀,好難得MAmiPOHpoh嚟香港!

    回覆刪除
  7. 培正對面公園仔,  是否是行steps上去那个??如果是,吖。。。我小时常同弟妹去玩啊,那个滑梯好高,我好驚啊!
    你们真的無约好穿黑衫啊??真是心有灵犀一点通哪!
    [版主回覆10/25/2008 22:59:00]九龍中央圖書館隔離的公園仔!係咪呢個呀? 應該係,不過而啲滑梯已經改膠的! 心有靈犀,真的,晏晝我見Frances見MAmiPOHpoh都着黑色,已經想夜晚亞pal同卓高會唔會又係着黑色呢?點知真係成枱都係黑色衫,除咗Rachel,真係俾Rachel笑C呢,席間她同我講,佢鍾意個男同學,但又唔可以同佢講"我愛你"...........

    回覆刪除
  8. good night baby!!!!!!
    [版主回覆10/25/2008 23:00:00]Good night!

    回覆刪除
  9. 唔知幾時有我份呢   不過我又乜都唔識整 點算呀~
    [版主回覆10/26/2008 08:19:00]MAmiPOHpoh你又唔熟,下次睇下邊班blogger你熟啲約你呀! 你有你最叻嘅例水ma!  

    回覆刪除
  10. 呢個黑色的聚會好開心呢!!! 仲有,多謝你陪我去搭巴士,你好叻呀!!眼明手快,如果唔係走咗班車,我又有排等啦!!!
    [版主回覆10/26/2008 08:17:00]hahaha..............眼明手快係我強項喎! 夜咗班次係耐啲架,我特登睇下有冇巴士嚟緊架! 個聚會真係好開心呢!

    回覆刪除
  11. 好開心嘅一次聚會呀!! 你地嘅組合好得意, 看似大家都來自唔同層面 (我意思係性別, 年齡等等), 但係又出奇地夾喎!! 所以話, 人嘅緣份都係好奇妙呀!!!!
    [版主回覆10/26/2008 09:01:00]真係好唔同嘅階層,年紀又唔同! 因為大家都好清楚對方囉,而且都聯絡咗一段時間,大家都有共同興趣~寫blog! 緣份真係好奇妙,我呢個師奶都唔會想到,blog帶來我生命中的新的一頁!

    回覆刪除
  12. 例水都見得人?  MU..............咁不如 我有機會見你地既時候 帶隻貓貓出黎 .......WAKKAKA 仲可以叫埋你地買多D零食比佢地hahaha~
    [版主回覆10/26/2008 09:03:00]心意ma!睇下幾時有機會一齊同師奶仔聚一啦!

    回覆刪除
  13. 貓地見到你咁講 好開心呀~ 佢地問 如月EE 係唔係有野食比佢架 跟住又同我講 媽媽 你咁傻 點去見人
    [版主回覆10/26/2008 09:40:00]唔好意思,我好驚貓狗架!  

    回覆刪除
  14. 早晨呀!!!!!!!!!
    [版主回覆10/26/2008 17:01:00]仲早晨?你去主席度請安都唔嚟我度!  

    回覆刪除
  15. 我反來啦!!!!!!!!!
     
     
     
    不過我又要出去啦!!!!!!!!
    [版主回覆10/26/2008 17:02:00]你又去邊呀,係咪做完學校義工呀? 又出去食飯? 咁你咪攞唔到第一囉?

    回覆刪除
  16. 咦,原來你地食飯前去左咁多地方架?可惜我個日要番工呀。你地唔好咁讚我,太誇獎我啦!
    [版主回覆10/28/2008 16:03:00]我都要返工,但特登放假架,我份工就係假期多,無其他福利啦! 難得MAmiPOHpoh係咁遠返嚟,梗係要陪下佢啦! 你真係一個幾斯文嘅青年(可能我未認識你)!  

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^