2008年9月7日星期日

~又嚟funky dance~好快又到中秋~


今日無乜嘢整,因為好倦又唔夠時間,


下午要去跳funky dance!


巡blog巡咗成朝,早餐自己沖奶茶,


用黑白牛奶沖,不過我覺得同低脂花奶無乜分別啫!


仲食咗個係'包點先生'買嘅麥饅包,正!



好快又到中秋,


突然間想起,點解我唔學整月餅啫,


唔係為咗自己喎,係想整個健康啲嘅月餅俾奶奶食,


奶奶本身有糖尿病,


如果可以整個佢可以食得嘅月餅就好啦,



有冇blog友可以教我呀?



中秋接近時,就會有呢隻芋頭仔,


我同囡囡都好鍾意食!


買咗返嚟要曬下佢先好食喎!




上星期,寫字樓有同事添丁,


派咗樽薑醋,食晒啲豬腳同蛋,就係淨番啲薑同醋,


我攞咗番嚟,

自己加咗啲蛋同豬手,


又係好好味嘅豬腳薑啦!




現在無咗個機場係九龍,啲樓就越起越高,


本來我屋企仲可以望到小小海面,


而家俾啲樓擋住晒啦!



今日都無乜時間整,好失望,


好想整方包,


但聽又要同囡囡去行街,


睇下返嚟仲有無時間整先,


而家真係有好多嘢想整,都要排下隊先!


 

12 則留言:

  1. 111111111111
    [版主回覆09/06/2008 21:13:00]叻女,我今晚睇你個blog,我同囡囡都覺得你個女個樣子好似我細妹個女呀!

    回覆刪除
  2. 早餐自己沖奶茶, 用黑白牛奶沖---->> 唔該順手沖多一大枝~
    奶茶是我的至愛飲品~  
    以前細個時,過中秋~都成日有食 芋頭仔的呢~都好多年沒吃過了~ 
    老人家有糖尿病真的好頭痕,過時過節,好多野都吃不到~
    您老公家山有福了~有您這個好新抱,咁錫奶奶~
    真係想整的,在Yahoo Blog打上"無糖月餅"食譜,
    或"無糖月餅做法"看看找不找到??
    [版主回覆09/06/2008 21:13:00]我都係茶精呀!無奶茶嗰日會好眼瞓仲會頭痛添! 呢個時間我買餸一定買一兩斤食,我同囡囡都好鍾意食!使唔使整啲14號俾你當早餐? 我唔知我奶奶覺唔覺得我好?我又唔會成日車佢出去食飯,又唔會成日整燕窩俾佢食(呢啲我叔仔老婆就成日做,但佢次次我地返去食飯都話唔得閑唔返架!)。我祇係諗到可以咁做啫,以我現時功力都唔知整唔整到俾佢食,或者出年啦! 知啦,收到!

    回覆刪除
  3. 月姐:你住边呀?景觀都好開揚,不錯噃!
    Funky Dance係咪好勁呀!我多數做yoga,我跳舞好渣但想玩吓啫。
    [版主回覆09/06/2008 21:59:00]我呢張相你見到嗰啲,傾邊都係我前面兩楝大廈呀,我祇係得條隙可以望到少少咋! 我住黃大仙! 我一路都有跳健康舞,但跳極都咁肥無法,而家興funky dance咪又去試,點知跳咗第一堂,對腳痛咗我幾日呀,不過今日第二堂無咁痛啦,但真係勁啲架!全班好似最老我咁!

    回覆刪除
  4. 我又唔會成日車佢出去食飯,又唔會成日整燕窩俾佢食--->>
    車~這可以代表甚麼呢~您要買,我可以介紹您入西貢
    果個泰國婆度買,幫您燉好哂,一大袋剩燕窩(沒加水的),
    仲可以選擇有糖 及無糖的,回家只需加入喜愛的配料
    (如冰糖紅棗或杏汁之類,無糖的更可以用來燉湯飲,我以前
    同公司拍檔都是買無糖的) 再燉番一,兩個小時便可食用,
    我女兒細個時食好多的~ 果陣買一袋才350元而已,
    份量仲多過果DXX燕窩莊好多的~ 不過~對老人家好,
    不是說物質的,有空多D陪吓他們飲吓茶,多些打個電話比
    他們傾吓計都係關心既一種~老人家需要的,正是這種~
    [版主回覆09/06/2008 22:08:00]我對燕窩敏感架,唔食得,仲好無錢買! 我地都係兩個星期返奶奶度一次,佢自從嫁咗入去之後,都無返過幾多次,成日都係平時車我奶奶去飲茶,人地有車馬,佢大佬係九龍城開糖水鋪,成日話星期六多人要幫手喎,佢兩個bb咁細都要幫手,我就唔信啦,佢同囡囡返加拿大攞出世紙要去成二個月,咁佢大佬間鋪咪要執,攞藉口,點解我咁講,因為有時我地出去酒樓食飯佢又嚟得喎.....哈哈係咪好奇怪呢? 我教亞囡叫佢唔好咁做人新抱呀,一家人食飯成日都唔返,咁兩個星期都唔可以抽二個鍾返嚟?間鋪唔夠人咪請人囉,佢個細女出世咁耐(成年),都係見過佢三次咋! 佢仲有好多嘢我唔滿意佢架...................

    回覆刪除
  5. 我媽咪話唔好飲咁多奶茶好濕熱架!
    以前我係英國每日都飲2杯,而家已經無飲啦
    [版主回覆09/07/2008 08:56:00]我唔知喎,但唔飲又支持唔到一日嘅工作!

    回覆刪除
  6. 我番来了,去了馬来西亚一日,你想整冰皮?冰皮我整过,焗的就無啊!你要不要食谱?我Blogspot去年有post啊!
    [版主回覆09/07/2008 08:56:00]你去玩呀?我係想傳統的月餅(無糖)俾奶奶啫,今年整唔到咪出年囉,不過今年我要學識整!

    回覆刪除
  7. 話你知我既減肥方法呀, 我無做野之後既幾個月之內輕左 10 磅呀 ! 係真家 ! 個肚腩都細左 !  最初真係覺得仲辛苦過返工, 依家乜都適應晒啦, 好彩又無反彈喎 ! (touch wood)
    我今日都有豬腳薑食呀, 姑姐個 BB 今日十二朝, 奶奶裝左一大湯碗比我, d 薑又唔辣喎, 真係好好味 !
    [版主回覆09/08/2008 10:43:00]啲薑醋真係幾好味,你咁嘅減肥我咪減唔到囉

    回覆刪除
  8. 咩係 黑白牛奶?
    [版主回覆09/07/2008 08:54:00]呢個係俗稱,係一般茶餐廳用嚟沖奶茶嘅一隻花奶~

    回覆刪除
  9. 你真係一個乖新抱呀, 特登學嚟整比奶奶食!!!
    [版主回覆09/07/2008 16:48:00]我想咋都未學識! 但次次大老爺都好漏氣,我都係自己返去幫奶奶煮飯先!

    回覆刪除
  10. 你屋企個境好靚呀!係唔係可以睇到煙花
    [版主回覆09/07/2008 16:50:00]你見到嗰啲就係我唯一望到嘅隙!煙花啲煙就睇到,我地俾前面個座擋住呀,我姑奶度就睇到!

    回覆刪除
  11. 係bor,我都要曬芋頭先!曬過真係好味d!
    [版主回覆09/07/2008 18:48:00]係呀,曬過收咗啲水份會好食啲! 我今日學人整"老麵",都唔知會點,你用過未?

    回覆刪除
  12. 小妹發現你在細節上很講究 ...女人吃嘢真的配合年齡已改變..現在勁食 薑醋,出街也要點來食...
    [版主回覆09/09/2008 19:06:00]人每個階段,鍾意食嘅嘢都有唔同口味!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^