【芒果班戟】~ 附食譜

~芒果班戟~

材料：麵粉100g，糖1湯匙，蛋3隻，牛油25g，牛奶1杯。

[可整6-8片班戟]

1. 麵粉篩好，蛋拂勻備用。

2. 將麵粉同糖拌勻，蛋汁分兩加入麵粉中攪拌勻。

3. 再加入鮮奶，拌成糊狀，用保鮮紙蓋待半小時。

4. 將牛油座溶或叮溶，逐少加入粉糊中拌勻。

5. 將芒果切粒備用。

6. 燒熱易潔鑊(小火)，用小小油拌勻，再用紙抺乾油份。

7. 傾入1穀粉糊，提起易潔鑊，打圈咁將粉糊平均咁分佈。

8. 輕輕用鑊鏟係糊邊慢慢揭起，放涼。

呢個係失敗嘅樣，因為初初煎唔係好熟，浪費咗兩張之後已經可以掌握到啦!唔易煎架!

9. 待班戟放涼後，加入芒果同甜忌廉，摺起。

10. 放入雪柜雪2小時食用。

樣子唔係好好喎!食過味道都OK，不過個皮就厚咗啲，下次應該會好啲!

唔知係咪唔係凍，啲忌廉有少少溶。應該要放係雪柜上格!

注意：要好小心睇火，好易煎燶。