2008年8月7日星期四

~休息~八號風號~


今日天氣

八號風球


無端端多一日假,本來都幾好,

可惜成日都要留意風暴消息,

隨時落"波"就要返工,

上次掛咗半日,

我都要迫咗兩個鐘先返到公司。



今朝都好早醒咗,自己沖咗奶茶同食咗多士,


就係電腦前巡blog,

十點大老爺醒咗就煮早餐,

佢唔知我食咗,又整份俾我,

呢個就係大老爺煮俾我嘅早餐啦!

今日成日係屋企又無地方去,呢度又無商場又無食肆,

乜都要搭車出去!

噚日知道有可能掛八號風球,

所以買餸都買多咗啲材料,所以今日午餐同晚餐都無問題,

而且屋企有好多儲量,幾日唔出街都唔會餓親!



今日午餐,

都係罐頭同雞翼,好彩買咗個生菜


我無肉食無飯食都無問題,

無菜食就唔多得!





今日晚餐



本來未打呢篇blog前都好好心情,

可惜又係俾大老爺一句說話,

今我..............



成日懵懵地煮下煮下煮又多咗餸;

一開飯我都話煮多咗,大老爺好似無聽到咁,

食下食下問點解煮咁多餸,點食得晒?

我咪同佢講計下計下
以為唔夠餸,


又蒸多咗啲蝦乾。

佢又係度笑啦,
乜好好笑咩,


我做乜都得,就係最介意人地用咁嘅態度對我,

佢都試過煮飯啦,乜到而家都唔明白,

一個煮飯婆有幾辛苦咩?

我叫佢唔好成日用啲"嬉皮笑臉"嘅態度對我得唔得,

點知佢話我'你又點解成日都黑口黑面呀?'


乜我真係咁咩,食飯前我都係笑笑口咁架,佢又見唔到咩?

點解佢淨係記得我黑面個樣啫?

我溫柔嗰陣佢又唔知,又唔會咁深刻,

話親佢,佢實話我成日發脾氣成日黑面,

呢句說話,對我真係傷害好大,我成日都想做好啲,

但倒頭來佢一講呢句話,即係話我之前所做嘅都係白費,

永遠都抺唔去我係佢心目中發脾氣嗰樣,

我都唔想架!我又無工人,乜都要自己做,

煮完見佢地乜都唔幫手,就好火滾,

我都要返工架,有時一返到屋企就開始煮餸,

水都無飲過一口呀!

你詁灰唔灰心呀!

做得好嗰啲佢就會擺係心,

唔鍾意嗰啲就出口話你,

咁真係無意思!





~蒸賴尿蝦乾蝦乾~



~蒜香牛仔骨~


~BB露筍本菇煮鳯尾卷~



~菜甫煎蛋~

~煎銀雪魚~




11 則留言:

  1. 睇到呢度,會心一笑,諗起以前在香港八號風球日子裹吃的 餸。再往下看,嘩!越出越多美味佳餚 !!心情唔好都可以煮咁多,真係口服心服!!可能大老爺想在八號風球高懸的時候,多多享受你的廚藝,咪特登激下你囉!點知你讓他的奸計得逞!!大老爺都會煮早餐給你,也是一種福氣呢!
    [版主回覆08/07/2008 06:35:00]我係煮咗先俾大老爺激親啫!呢樣成日都發生,我一話佢,佢就駁我呢句架,攪到我無晒自信,我成日都想做個溫柔嘅太太,但佢一句就打沈我呀!

    回覆刪除
  2. 妳有幾多人食飯架?
    同埋蒸賴尿蝦乾蝦乾係水上人嘅至愛.因我呀爸係漁民.
    [版主回覆08/07/2008 06:31:00]多謝的來訪,我一屋四口啫!不過煮到第二碟先知自己攪錯咗,煮咗五碟喎!咁啱有同事入大澳,咁咪叫佢幫我買啲蝦乾囉,我唔係漁民,平時多數用嚟煮菜,不過噚日無買餸。

    回覆刪除
  3. 佢唔係“笑”妳,係欣賞妳的能幹!
    [版主回覆08/07/2008 06:29:00]你望唔到個樣!佢永遠唔會將我好嗰啲講出口,成日都話我發脾氣黑面,咁你話係屋企咁忙,佢地又唔幫手,個人梗係忟,都唔使成日提架,仲話我成日黑面,我做咗佢煮飯婆十幾年,佢都無讚過我一句,上次病咗兩個星期,佢一句都無問過我呀?乜咁難開口咩,又唔係要佢講我愛你!

    回覆刪除
  4. 我黎探你喇 ! 今日打風但我都好唔得閒... 因為要陪老公 hahaha
    [版主回覆08/07/2008 06:25:00]多謝你啦!我係咁架,佢一咁話我就頂唔順,知你老公仔放假你就最忙....haha....我今日要返工呀!

    回覆刪除
  5. ∞∞∞∞∞∞∞∞∞ Ðädä ∞∞∞∞∞∞∞∞2008年8月7日 下午9:50

    我都明白煮飯既心情架。煮得少怕唔夠食。煮得多又怕食唔哂。唉...有時啲大帝胃口好可能又唔夠食啫。唔該體諒下我哋哩啲一家之煮啦(  其實我唔係成日煮點解咁講呢)。大熱天時真係煮到又頭濕到落腳趾尾呀!
    [版主回覆08/07/2008 14:07:00]我都係無心架,煮到第二碟先發覺點解仲大咁多碟要煮?(老人癡呆),男人都係唔明白,話佢一句佢就咁話我!

    回覆刪除
  6. 男人好多都係咁 因為我地日日都差唔多好似指定動作咁做個d野 但係佢地呢 1個月都未必會做一次 間唔中做 佢地緊係唔知辛苦慘啦 仲要比說話人地聽 至慘
    不過我成日都呃自己 唉~ 諗下佢好多d lo "骨"一聲 吞左佢算 haha~
     
    [版主回覆08/07/2008 15:09:00]你講得啱,佢地都唔識體諒另一半!佢有好多好處,但最衰係把口囉!唔算可以點呀!多謝你呀!

    回覆刪除
  7. 係三十幾度高溫煮飯,有幾辛苦D男人又點明白? 你家老爺真係身在福中不知福, 嬲咪上黎呻下,唔好放係心入面
    [版主回覆08/07/2008 19:14:00]係呀有你地呢班blog友,真係好開心,起碼我有個地方俾我呻下囉,嬲都無得嬲啦!呢個世界有無體貼嘅男人呀,煮多碟餸啫!我最唔開心係佢成日掛係口唇邊個句-你成早都發脾氣成日都黑面!

    回覆刪除
  8. 煮飯真係幾辛苦架 ,  尤其係天熱 ,已經煮到熱鬼辣辣 , 煮完都冇乜胃口食 , d男人飯來張口 , 吾使煮又吾使洗 , 真係身在褔中不知足
    [版主回覆08/07/2008 19:15:00]最慘你見佢仲坐係梳化度無理到你呀,你返工我都要返工架!有時唔想鬧人但真係忍唔住囉!

    回覆刪除
  9. 個晚餐超正啦!  早餐就.... d腸仔燶咗d喎!你要訓練大老爺整多d早餐比你食,等佢慢慢改進至得!
     
    [版主回覆08/08/2008 06:17:00]大老爺係唔到我去訓練架,佢唔會聽人講嘅!

    回覆刪除
  10. 佢咁鬼硬脛!你咪鬼縱壞佢啦!男人好似細路仔咁,好容易就縱壞晒.
    [版主回覆08/08/2008 14:39:00]我由一開始都俾佢騎住架啦!

    回覆刪除
  11. 唉! 愛情就會令人咁盲目架嘞!阿大老爺真幸福!
    [版主回覆08/08/2008 19:45:00]希望佢知道啦!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^