2008年8月3日星期日

~囡囡病了~師傅~

今日天氣


依然係咁熱



噚日半夜,聽到房外好嘈雜,


原來,囡囡嘔吐大作

,成張床都係!



大老爺梗係話佢唔落床去嘔啦,


因為囡囡張床係上格床嚟,


清潔起上嚟都好複雜,


最慘佢嘔係牆邊(下面有櫃)好難抺,


要搬個櫃出嚟先可以抺到,


唔知係咪噚日食咗啲唔乾淨嘅魚生?


因為晚飯佢地係姑媽度食住家飯,


應該無問題架!


三個人淨係得佢有問題。


好在今朝都無乜事,


平時佢係咁架


今日就瞓咗係梳化!


胃口又唔多好!


見到囡囡咁樣,真係心痛!



咁多年我都係呢個"煮海"浮沈,


由中學已經要幫亞媽煮飯,


因為媽子返工,我咪負責煮啲簡單嘅餸菜俾細佬妹食。


我係大家姐嚟架!返學都無家政呢科,


所有都係"家庭中學"度學,


而家囡囡都家政學,但係就連行埋個爐度都怕熱,


蛋都唔識煎一隻!


我一路以嚟都有買烹飪書嘅習慣,


因為成日都無乜靈感煮乜餸,


又想俾啲新煮意佢地食,


所以所有烹飪書都係我嘅"師傅",



我仲有剪報嘅習慣,


剪剪埋都有幾本烹飪書!


嗜好!我仲有一個嗜好,遲啲再講,等我儲好啲資料先!




因為想清咗啲存貨,早前係大埔買嗰啲"清心丸"



今日煮咗個糖水,個名好長架!


~腐竹白果雞蛋清心丸糖水~




仲有個


~朱古力奶凍~


因為唔記得用匙抺走啲泡,所以咁肉酸..........





我的減肥日誌


第11日︰唔敢上磅


早餐:兩塊白麵包+無糖低脂奶茶。



午餐:肉飯蒸飯+雲吞4粒+凍奶茶少甜。


下午茶:清心丸糖水。


晚餐:大家樂。


大家唔樂!一個好唔好嘅經驗,我食嘅係一個套餐叫"無錫排骨/麻婆豆腐飯"$33。
一攞出嚟我個口成個O字咁呀,兩碟餸,無錫排骨得無舊,

我問個經理"得兩舊呀",佢即刻攞返去出菜處叫入面加多舊,但入面拒絕咁做,仲話我個兩舊大舊所以得兩舊喎!個兩舊唔記影相,一舊2"X2",一舊1"半X1",你話大唔大呀!

麻婆豆腐就真係得豆腐,我好辛苦先係碟豆腐度攞到一粒豬肉,記住係一粒呀!

知我要減肥呀,淨係可以食二兩肉?成33蚊得個兩啖肉。
大奸商!加咗價仲少咗餸,28蚊個四寶仲多肉過我個碟!
佢地仲好似好好心咁,其實驚我係度嘈,話加啲豆腐俾我喎,咁難食嘅豆腐仲加俾我做乜!

我以後如果有選擇我都唔會再去大家樂食晚餐!


 

9 則留言:

  1. 囡囡嘔,會唔會因為中暑呀?
    事關早前我朋友個妹就係咁,胃痛胃痛,原本係輕微中暑...
    [版主回覆08/03/2008 08:17:00]應該唔係,我地都無出街,淨係出去食壽司咋!佢個病徵係腸胃呀!無事啦!疴完嘔完無事啦!
    不過我地就清潔咗成日啫!

    回覆刪除
  2. 可能囡囡腸胃炎?要食清清地既野呀!
    [版主回覆08/03/2008 08:18:00]多謝關心呀!佢無事啦!都唔清楚佢食錯乜,不過最大可能都係元氣啦,我地食嘅壽司係唔同,我地都無事,係佢咁!

    回覆刪除
  3. 我都有你果本百變雞翼啊!!!
    大家樂都幾呃錢窩噤樣!! 不過佢地D焗豬扒飯真係幾好食的
    [版主回覆08/03/2008 08:22:00]大家樂食物係幾好食!不過已經加完價,仲要將啲食物做到咁,有冇攪錯呀!成個餐都唔夠兩啖肉,離譜呀!我係其他食店(佢上面),人地個客飯,有成碟蒸餸呀!越大越出名就越係咁!
    百變雞翼係買招呼大少架!佢最鍾意食雞翼雞扒架!無雞不歡!

    回覆刪除
  4. 快餐店d食品貴左又細左 , 加得最多係" 阿活 " , 好都少左幫襯
    [版主回覆08/03/2008 08:26:00]係呀,越大越出名就越衰,價又加咗,以前個個餐都包飲品,而家個個餐都要加錢配飲品,咁咪仲貴,我以後迫不得已都唔會再去大家樂!

    回覆刪除
  5. 清心丸....我好似未食過呀!
    [版主回覆08/03/2008 16:31:00]九龍城有啲舊式糖水鋪都有得食,我都係第一次見,聽我就聽過,始終未食過,嗰次係大埔街巿見有得買,咪買咗擺係冰箱囉,都幾得意!爽爽地咁!

    回覆刪除
  6. 小心身體, 希望你囡囡冇事la
    [版主回覆08/03/2008 16:33:00]囡囡無事啦,小病啫!

    回覆刪除
  7. 清心丸 係乜東東呀?囡囡好事就好喇,有冇睇醫生呀?要小心身體。這幾天忙、忙...,遲些再覆你。。。等等我!
    [版主回覆08/03/2008 16:37:00]原來咁多人都唔知清心丸係乜東東喎!我好耐之前都聽過清心丸糖水,係茶樓聽過,清心丸係潮州人嘅一種甜品嘅材料,煮一陣就得,好煙un,無乜未架!應該可以話似椰果咁一粒粒囉!煮出嚟係透明架!
    知你忙,因為最近好似好少見你留言,唔緊要,得閑再睇番我啲日誌囉!我一定等你嘅!

    回覆刪除
  8. Is 囡囡 better already? better eat porridge for awhile!
    [版主回覆08/04/2008 16:44:00]囡囡已經無事,多謝你關心!

    回覆刪除
  9. 我想問買左d清心丸係咪要放在冰箱o既! 咁可以存放幾耐要煮來食呢? 清心丸肥唔肥架! 我好鐘意食d煙煙un un的東西架!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^