2008年7月25日星期五

快樂餅店~奶油卷

 
今日天氣



今朝俾大老爺激親!

晏晝想食車仔麵,

咁熱都行出灣仔買,


點知"東主有喜,休息三天"

諗住過隔離買雞扒撈檬la,

但自從亞蘇介紹過之後,鬼咁多人,

我以為外賣唔緊要啦,

點知我等咗成5分鍾,
連單都冇人同我落,


咁咪唔買囉,就係咁樣,成身都濕晒,

終於我都係食"酸辣湯水餃"



我嘅減肥又告失敗,

行過快樂餅家,對腳唔聽話,

行咗入去買咗件"奶油卷"




呢樣又係一樣我最懷念嘅食物之一,

無乜邊度可以食番呢種味道,

新的麵包店做唔到呢種奶油,

真係好好味!




星期五晚,又係我同大老爺二人世界嘅時候,

點知俾佢啲壞習慣破壞晒!
t1453c5885e7f12if3.gif


佢一路都有遲到嘅習慣,

記得以前我頂着8個月個肚都要企係街度等佢,

佢唔係因為工作關係而遲到,

完全都係佢自己嘅習慣!

好似今晚我約佢7點半,

佢居然可以7點2先係屋企出發,

t1453c58cfc4ca1no9.gif
終於7點10先到!
t1453c58d13e9f6yt1.gif


上天好似玩我咁,

對我呢個時間觀念極重嘅人,

要成世面對呢個次次都遲到嘅另一半!

嬲咗一陣都要食架!

我揀咗呢間,因為我想食雲南米線。

幾好味,碗麵有好多酸菜同炸菜,


 
小辣我都覺得幾辣,大老爺叫咗個中辣,



點知成日啪嗜辣嘅佢都覺得好辣。


 
啲餸就唔係樣樣都好食,

我叫嘅豬扒原來係吉列豬扒,成舊粉我都食唔到肉味。

食完行個呢間咁多人排隊嘅鋪頭,

大老爺又發揮佢八卦嘅本性,

一於排埋一份買番杯試下好唔好飲,



飲落真係又抵($10)又好飲喎,

唔怪之次次行過都咁多人啦!





8:00 自己沖嘅奶茶



10:30 低脂乳酪+瑪莉餅

13:30 酸辣湯水餃(無食啲水餃皮)+白桃2個

16:15 奶油卷

20:00 酸辣豬扒炸菜肉絲削條麵+牛腩4件(小)+蘿蔔4粒+通菜

23:00 火龍果半果+彩虹奶茶1/3杯

(今日都唔乖,跟住兩日仲死,又去飲茶,放假我就會好放肆!)

9 則留言:

  1. 拍拖過二人世界係開心事~ 唔好嬲喇 ! 你知道習慣既野好難改...跟一世架 !
    [版主回覆07/25/2008 23:38:00]我都話咗我嬲一陣咋!

    回覆刪除
  2. 今日放假~你地會去街街嗎?
    [版主回覆07/26/2008 09:22:00]乜你咁早呀?通常星期六我都會買早餐返嚟俾佢地食!佢地個個都唔願出去食!街街都無乜地方去,而且換咗幾個柜,要執屋呀!

    回覆刪除
  3. 我每日都一早起身整早餐比蕉爸食架 ! 我都好鍾意執屋架 ... 我係潔癖王
    [版主回覆07/26/2008 09:39:00]我知呀,我有睇你以前啲日誌,不過未睇晒!
    我之所以要出去買早餐,係我要飲奶茶,又懶又唔想煮!
    你地兩口子可以好多時間做好多嘢!
    天氣熱我就好怕,因為一郁身就成身汗!人肥無辦法!

    回覆刪除
  4. 我既另一半都係架 , 十次有九次都係我等佢 , 最耐果次等左成粒鐘 , 等到悶哂 . 不過無法啦  有時佢臨收工 , 有野都要做埋先走得
    [版主回覆07/26/2008 09:41:00]喂!做嘢我就係唔會怪佢啦!但係佢係屋企出嚟咋!呢個係佢習慣,佢去邊度有幾遠都係預半小時出門口咋(包括等車時間),唔遲到就奇!

    回覆刪除
  5. 嘻嘻 ~ 我都好肥呀 ! 我連奶茶檸茶都自己整 為左要慳錢無辦法喇 ~
    [版主回覆07/26/2008 09:53:00]hahaha.........同我鬥肥!你有無去我相薄睇過,"三姐妹"中最肥最老嗰個咪我囉....hahaha..........
    我係懶呀!煮到一頭煙,不過,我開始減肥,可能都會諗吓自己係屋企煮,出邊啲嘢真係加得好貴......
    有無睇返我以前啲日誌?我最初開blog係想將唔開心啲嘢寫咗落嚟,因為我鍾意寫嘢囉,後來越寫越過癮,如果我啲細路細嘅時候興blog呢個玩意,我就可以記錄落嚟!

    回覆刪除
  6. 每個星期五每是二人世界時刻,好甜蜜啊!拖下手仔就冇事喇!只 嬲一陣 就好啦, 唔好 嬲親自己呀!
    [版主回覆07/26/2008 14:58:00]大老爺無拖我隻喎,佢好衰架!
    我一定唔會嬲自己!

    回覆刪除
  7. 你都好誇喎!一日食咁多嘢...
    多謝你留言俾我,多謝哂...
    [版主回覆07/26/2008 15:55:00]多謝你回覆呀,我真係食好多嘢?
    所以我要寫出嚟提醒自己囉!同大老爺一齊我覺得我食好少咋!

    回覆刪除
  8. 我鐘意辣呀!仲有奶茶添,正呀!
    唔得!而家去沖番杯黎飲下先得.....引死人~!!!
    [版主回覆07/26/2008 15:58:00]我學BLOG友話去買咗啲伯爵茶包,加埋自己訂嗰啲紅茶,沖出嚟就覺得幾完美,之前總覺得啲紅茶欠咗啲嘢,原來久咗伯爵啲茶香味!
    你可以用一包伯爵茶包+紅茶包+低脂花奶去沖一次,包你覺得好飲過三合一呀!

    回覆刪除
  9. 我而家好少飲奶茶
    媽咪話飲得多唔係幾好對身體
    [版主回覆07/26/2008 22:32:00]係架,人地話奶茶係一樣完全無營養的飲品,可以話係一種垃圾食物,不過飲咗十幾廿年無得改la.....

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^