2008年6月16日星期一

芙蓉蛋飯~青瓜煎魚柳~咖喱薯仔雞翼~馬蹄土魷肉餅~粉葛紅蘿蔔唐排湯


今日唔係好舒服!

其實噚日已經開始喉嚨痛,今朝起身仲痛,快啲食番兩粒"幸福"!


本來唔係好想煮午餐俾佢地食,但出去又唔知食乜,終於整咗


芙蓉蛋飯 [蛋4隻、义燒$10、銀芽$3、蟹柳3條]         Step 1:將义燒、蟹柳切絲,打蛋加少許鹽。           Step 2:炒一下义燒,將銀芽一齊同义燒炒軟,盛起。  Step 3:燒熱個鑊,落油,將蛋汁倒一半落鑊,再將一半义燒材料放係蛋面,煎好一面,慢慢將蛋反轉,再煎另一面。                                                       Step 4:將"甜豉油"加一茶匙糖煮溶,做飯汁。



我就因為太肥,所以食米粉好啦!



"晚餐啦"


咖喱薯仔炆雞翼~青瓜炒魚柳~馬蹄土魷肉餅~蒜茸炒白菜仔~粉葛紅蘿蔔唐排湯


咖喱薯仔炆雞翼                                             [雞翼10隻、薯仔2個、紅蘿蔔數片、咖喱粉]             Step 1:先將雞翼解凍,用雞粉、胡椒粉、豉油、酒、糖醃半小時。                                                   Step 2:薯仔、紅蘿蔔切件。                            Step 3:先起油鑊爆香雞翼、薯仔、紅蘿蔔,再落咖喱粉,加水,炆至乾水。



青瓜炒魚柳                                                   [青瓜2個、魚柳1件]                                      Step 1:將魚柳解凍,用胡椒粉、薑汁、酒、雞粉醃半小時。                                                      Step 2:撲小許生粉於魚柳面,切件,用平底鑊煎香(可加蒜鹽),盛起。                                              Step 3:起鑊炒青瓜至熟,加入魚柳,上碟。


係吉之島買嘅!


馬蹄土魷肉餅                                                [豬肉$15、馬碲3粒、土魷2片(中size 2片,大size 1片)]Step 1:先浸軟土魷(唔可以浸太耐,土魷會無晒味),馬碲、土魷切粒。                                               Step 2:挅好豬肉,加入土魷粒、馬蹄粒、雞粉、豉油、生粉、糖攪均,記得加少許水,肉餅會無咁硬。            Step 3:蒸10-15分鐘,收水就OK!



滿足呀!


 

3 則留言:

  1. 豐富喔~~~
    [版主回覆06/16/2008 17:25:00]多謝!
    請繼續收看!

    回覆刪除
  2. 你唔舒服,都煮出咁豐富好味的午餐,好厲害喲!
    [版主回覆06/17/2008 07:57:00]我祇係有啲感冒,但個喉嚨就好痛!
    無辦法啦,我唔食佢地都要食!其實芙蓉蛋好易整,所以都唔辛苦!

    回覆刪除
  3. 睇到好肚餓添
    [版主回覆06/17/2008 13:56:00]咁你不如整兩味食囉!

    回覆刪除

:) :( ;) :D :-/ :x :P :-* =(( :-O X( :7 B-) #:-S :(( :)) =)) :-B :-c :)] ~X( :-h I-) =D7 @-) :-w 7:P 2):) :!! \m/ :-q :-bd ^#(^